सगरमाथाको मुस्कानमा नेपाली कफीको परिचय : बारिस्टाबाट आरोही बनेकी दाफ्नी शेर्पाको प्रेरणादायी यात्रा

काठमाडौं — सानो क्याफेबाट यात्रा सुरु गरेकी दाफ्नी शेर्पाले सगरमाथा आरोहणमार्फत नेपाली कफीलाई अन्तर्राष्ट्रिय मञ्चमा चिनाउने आफ्नो सपना पूरा गरेकी छन्। दोलखाको मेशमेर गाउँमा जन्मिएकी उनी बारिस्टा मात्र होइनन् — उद्यमी, मिस शेर्पा २०१८ विजेता र सगरमाथा आरोहण गर्ने पहिलो महिला बारिस्टा समेत हुन्।

शिक्षाका लागि काठमाडौं आएकी दाफ्नीले ‘मिनिट कफी’ नामक क्याफेबाट आफ्नो करिअर सुरु गरिन्। कामसँगै उनले विभिन्न कफी प्रशिक्षण लिएर सीप अभिवृद्धि गर्दै गइन्। यही बीचमा उनले नेपाली कफीलाई संसारभर चिनाउने संकल्प गर्दै सन् २०१८ मा सगरमाथा चढ्ने योजना बनाइन्।

तर आर्थिक अवस्था कमजोर थियो — सगरमाथा चढ्न ३० लाख लाग्नेमा उनको हातमा २० हजार पनि थिएन। फेसबुकमार्फत सहयोग आह्वान गरिन्, जसबाट ६०% रकम जुट्यो। बाँकी खर्च उनले आफ्नै कफी सपबाट संकलन गरिन्।

२४ मे २०१८ मा उनले दुई विदेशी र दुई नेपाली आरोहीसँगै सगरमाथा चढेर त्यहीँ कफी बनाएर पस्किन सफल भइन्। उनले भनिन्, “सगरमाथाले मलाई नयाँ पहिचान दियो, म सधैंभरी ऋणी छु।”

अहिले उनी तीन वटा कफी ब्रान्ड सञ्चालन गर्दै २०० भन्दा बढी युवालाई तालिम दिइसकेकी छन्। उनले बागमती प्रदेश सरकारसँग सहकार्य गर्दै ४० महिलालाई कफी तालिम दिइरहेकी छन्। उनको अर्को लक्ष्य — नेपाली कफीलाई अन्तर्राष्ट्रिय ब्रान्ड बनाउने।

दाफ्नीको कथा नेपाली कफीको मात्र नभई आत्मनिर्भरता र संघर्षको कथा हो।