नेपालको इन्डोनेसियामाथि ३७० रनको सानदार जित

काठमाडौं — मलेसियामा जारी ACC पुरुष U-16 ईस्ट जोन कपअन्तर्गत नेपालले तेस्रो खेलमा इन्डोनेसियामाथि ३७० रनको शानदार जित हासिल गरेको छ।

नेपालले दिएको ४२१ रनको विशाल लक्ष्य पछ्याउने क्रममा इन्डोनेसिया २४.३ ओभरमै ५० रनमा समेटियो।

कप्तान विप्रश शाहीले ७.३ ओभरमा १२ रन खर्चेर ६ विकेट लिँदै उत्कृष्ट बलिङ प्रदर्शन गरे।

यसअघि नेपालका लागि प्रसिद्ध श्रेष्ठले १३२ रनको शतकीय पारी खेले। उनले ११५ बलमा १५ चौका र १ छक्का हिर्काए। यस्तै, परमाणान यादवले २८ बलमा ७१, रौनक श्रीवास्तवले ७१ बलमा ८८ र रोय थापाले ४१ बलमा ५७ रनको योगदान दिए।

नेपालले टस हारेर पहिले ब्याटिङ गर्दै ५० ओभरमा ५ विकेट गुमाएर ४२० रन बनाएको थियो।

यो जितसँगै नेपाल ३ खेलबाट ६ अंकसहित समूह ‘ए’ को शीर्ष स्थानमा उक्लिएको छ।