कोटेश्वर क्याम्पसद्वारा चौथो ओपन कलेज नकआउट फुटसल प्रतियोगिता हुने

काठमाडौं, ३० जेठ – नेपाल विद्यार्थी संघ, कोटेश्वर बहुमुखी क्याम्पस ईकाई समितिको आयोजनामा चौथो ओपन कलेज नकआउट फुटसल प्रतियोगिता हुने भएको छ। प्रतियोगिता सम्बन्धी जानकारी आज (शुक्रबार) आयोजित पत्रकार सम्मेलनमार्फत सार्वजनिक गरिएको हो।

स्ववियु सभापति सञ्जय बुढाथोकीका अनुसार, गत चैत १५ गते काठमाडौंमा भएको राजावादी आन्दोलनका क्रममा प्रहरीको गोली लागेर घाइते भएकी रेबिका खत्रीलाई न्याय दिलाउन ध्यान केन्द्रित गर्दै प्रतियोगिता आयोजना गरिएको हो। प्रतियोगिता आगामी असार २ र ३ गते भक्तपुरको लोकन्थलीस्थित मध्यपुर फुटसल ग्राउण्डमा आयोजना हुनेछ। सभापति बुढाथोकीका अनुसार, प्रतियोगितामा ३५ देखि ४० वटा टोलीहरूको सहभागिता रहने अपेक्षा गरिएको छ।

कार्यक्रम सञ्चालन स्ववियु सचिव प्रदीप कार्कीले गरेका थिए। कार्यक्रममा क्याम्पस प्रमुख प्रकाश पोखरेल, सहायक प्रमुख मनोज अधिकारी, नेपाल प्राध्यापक संघका अध्यक्ष सुरेश पोखरेल, अतिरिक्त क्रियाकलाप प्रमुख किशोर ढकाल, शिक्षिका उषा शाह लगायतले प्रतियोगिताको सफलताको कामना व्यक्त गरे।