अमेरिकाबाट नेपालीलाई दिँदै आएको टीपीएस सुविधा खारेज, करिब ७ हजार नेपाली फर्कनुपर्ने

संयुक्त राज्य अमेरिकाले नेपाली नागरिकलाई प्रदान गर्दै आएको टेम्पोररी प्रोटेक्टेड स्टाटस (टीपीएस) सुविधा अब अन्त्य गर्ने निर्णय गरेको छ। यस निर्णयसँगै अमेरिका टीपीएसको आधारमा बसोबास गर्दै आएका करिब ७ हजार नेपाली नागरिकलाई स्वदेश फर्किनुपर्ने अवस्था आएको छ।

अमेरिकी होमल्याण्ड सेक्युरिटी विभागले नेपालस्थित वर्तमान अवस्थाको मूल्यांकन र अन्य सम्बन्धित निकायहरूसँगको समन्वयपछि टीपीएस खारेज गर्ने निर्णय लिएको हो। यूएस सिटिजनसिप एण्ड इमिग्रेसन सर्भिस (USCIS) को वेबसाइटमा सार्वजनिक सूचना अनुसार, नेपाल अब टीपीएसका लागि उपयुक्त नरहेको ठहर गरिएको छ।

होमल्याण्ड सेक्युरिटीकी सचिव क्रिस्टी नोएमको निर्णय अनुसार, नेपालमा टीपीएस जारी राख्नुपर्ने कानुनी आधार अब नदेखिएको उल्लेख गरिएको छ। यसअनुसार नेपालका लागि टीपीएसको वैधता सन् २०२५ अगस्ट ५ तारिख राति ११ः५९ बजे औपचारिक रूपमा समाप्त हुनेछ। यसअघि नै टीपीएसमा रहेका नेपालीहरुले वैकल्पिक कानुनी उपाय नभएमा स्वदेश फर्कनुपर्नेछ।