सुदूरपश्चिम बजेटमा सत्तारुढ सांसदकै असन्तुष्टि

कैलाली । सुदूरपश्चिम प्रदेश सरकारले तीन महिनाको बजेट शून्यतापछि ल्याएको ३७ अर्ब ६९ करोड रुपैयाँको बजेट सत्तारुढ सांसदकै असन्तुष्टिले विवादमा परेको छ।

नेकपा संसदीय दलले बजेट अध्ययन गर्न समिति गठन गर्ने, प्रतिवेदनका आधारमा पूरक बजेट ल्याउने र त्यसअघि पुँजीगत बजेट कार्यान्वयन नगर्ने समझदारी गरेको छ।

मंगलबार बिहान बसेको नेकपा संसदीय दलको बैठकले बजेट अध्ययनका लागि संसदीय समिति गठन गर्ने निर्णय गरेको हो। समितिले अध्ययन गरी प्रतिवेदन नबुझाएसम्म पुँजीगततर्फको बजेट कार्यान्वयन नगर्ने समझदारी भएको नेकपाका सांसद अक्कलबहादुर रावलले बताए। उनका अनुसार समितिको प्रतिवेदनका आधारमा पूरक बजेट ल्याउने सहमति पनि भएको छ।

यस्तै प्रमुख प्रतिपक्षी दल नेपाली कांग्रेसले बजेटमा बेथिति रहेको भन्दै प्रदेश सभा बैठक बहिष्कार गर्ने निर्णय गरेको छ।