लुटिएका सामान फिर्ता गर्न अख्तियारको आग्रह

काठमाडौं । अख्तियार दुरुपयोग अनुसन्धान आयोगले हालैका तोडफोड र आगजनीका क्रममा विभिन्न कार्यालयबाट चोरी भएका उपकरणहरू फिर्ता गर्न आग्रह गरेको छ।

आयोगले विज्ञप्ति जारी गर्दै इटहरी, हेटौंडा, पोखरा, बुटवलसहितका कार्यालयमा भएको तोडफोड र लुटपाटबाट हराएका सामग्री सुरक्षामा सहयोग पुर्‍याउन अपिल गरेको हो।

सामान फेला परे काठमाडौं क्षेत्रको हकमा प्रहरी वृत्त मालिगाउँमा बुझाउन तथा अन्य जिल्लामा सम्बन्धित प्रहरी कार्यालयमा बुझाउन आयोगले अनुरोध गरेको छ। चोरी वा लुटपाटमा संलग्न व्यक्तिहरूलाई भने सीसीटीभी फुटेजका आधारमा पहिचान गरिँदैछ।

आयोगका अनुसार जेनजी आन्दोलनका क्रममा चारपाङ्ग्रे र दुईपाङ्ग्रे गाडी, टेलिभिजन, कम्प्युटर, माइक्रो ओभन, हार्ड डिस्क, स्क्यानर, क्यामेरा, आइप्याड, मोबाइल, ल्यापटप, हिटर, पंखालगायतका विभिन्न उपकरण चोरी भएका छन्।