आज निजामती सेवा दिवस :विभिन्न कार्यक्रमको आयोजनागरी मनाईँदै

काठमाडौं । आज नेपालभर ‘निजामती सेवा दिवस’ मनाइँदैछ । निजामती कर्मचारीहरूले विविध कार्यक्रमको आयोजना गरी यस दिवसलाई विशेष रूपमा चिनाइरहेका छन्।

नेपालमा पहिलोपटक २०१२ साल भदौ २२ गते निजामती सेवासम्बन्धी ऐन जारी गरिएको स्मरणमा, २०६१ सालदेखि प्रत्येक वर्ष यस दिनलाई ‘निजामती सेवा दिवस’ का रूपमा मनाउन थालिएको हो।

यस अवसरमा सिंहदरबारस्थित संसद भवनअगाडिबाट प्रभातफेरी प्रारम्भ गरिएको छ, जसले भृकुटीमण्डपस्थित नेपाल पुलिस क्लब पुगेर मुख्य समारोहमा रुपान्तरण हुने कार्यक्रम रहेको छ।

समारोहमा यस वर्ष उत्कृष्ट कार्य सम्पादन गरेका निजामती कर्मचारीलाई सम्मान गर्ने तयारी गरिएको छ। प्रधानमन्त्री केपी शर्मा ओलीले उत्कृष्ट निजामती सेवा पुरस्कारअन्तर्गत १० जनालाई जनही एक–एक लाख रुपैयाँसहित सम्मान गर्नेछन् भने निजामती सेवा पुरस्कारमार्फत ३० जनालाई जनही ५० हजार रुपैयाँको दरले सम्मान गरिनेछ।

यसै अवसरमा देशभरका निजामती कर्मचारीलाई आज सार्वजनिक बिदा दिइएको छ।