नारायणी डेभलपमेन्ट बैंकले असोज २ गतेदेखि शतप्रतिशत हकप्रद शेयर निष्कासन गर्ने

काठमाडौं । नारायणी डेभलपमेन्ट बैंक लिमिटेडले असोज २ गतेदेखि शतप्रतिशत हकप्रद शेयर निष्कासन गर्ने भएको छ।

बैंकले हाल कायम २६ करोड २४ लाख ६७ हजार ६०० रुपैयाँ चुक्ता पूँजीको आधारमा प्रतिशेयर १०० अंकित मूल्यका २६ लाख २४ हजार ६७६ कित्ता हकप्रद शेयर जारी गर्न लागेको हो।

यसअघि बैंकले भदौ ९ गते बुकक्लोज गरेको हुँदा भदौ ८ गतेसम्मका शेयरधनीहरू मात्र यस हकप्रदमा सहभागी हुन सक्नेछन्। हकप्रद शेयर असोज २२ गतेसम्म आवेदन दिन सकिने छ।

निष्कासनका लागि गराइएको रेटिङमा इक्रा नेपालले ‘इक्राएनपी इस्यूअर सी प्लस’ प्रदान गर्दै बैंकको वित्तीय दायित्व निर्वाह क्षमतामा उच्च जोखिम रहेको टिप्पणी गरेको छ।

हकप्रदको बिक्री प्रबन्धकमा ग्लोबल आइएमई क्यापिटल लिमिटेड नियुक्त गरिएको छ। साथै, ग्लोबल आइएमई बैंकको भुमही शाखा, नारायणी डेभलपमेन्ट बैंकको केन्द्रीय कार्यालयसहित यज्ञपुरी, टाँडी, पर्सा र नारायणगढ शाखाबाट आवेदन दिन सकिनेछ। त्यसैगरी, आस्बा सुविधा भएका सम्पूर्ण बैंक तथा वित्तीय संस्था र ‘मेरो शेयर’ अनलाइन प्रणालीमार्फत पनि आवेदन दिने व्यवस्था छ।

हकप्रद निष्कासन र बाँडफाँटपछि बैंकको चुक्ता पूँजी ५२ करोड ४९ लाख ३५ हजार २०० रुपैयाँ पुग्नेछ। संकलित पूँजी भौतिक पूर्वाधार विस्तार, दुई नयाँ शाखा स्थापना तथा धितोपत्र, सरकारी ऋणपत्र र म्युचुअल फण्डमा लगानी गरिने बैंकले जनाएको छ।