पूर्वराष्ट्रपति भण्डारीलाई ५१ किलोको मालाले स्वागत, एमाले नेताहरुको भीड

रौतहट । पूर्वराष्ट्रपति विद्यादेवी भण्डारीलाई बाराको सिमरा विमानस्थलमा नेकपा एमाले नेताहरूले भव्य स्वागत गरेका छन्।

शनिबार काठमाडौंबाट वीरगञ्ज उद्योग वाणिज्य संघले आयोजना गरेको ‘वृहत महिला सम्मेलन–२०८२’ मा प्रमुख अतिथिका रूपमा सहभागी हुन सिमरा पुगेकी भण्डारीलाई ५१ किलो तौलको माला लगाएर सम्मान गरिएको हो।

स्वागत गर्नेहरूमा एमाले स्थायी कमिटी सदस्य मुकुन्द न्यौपाने, पोलिटब्युरो सदस्य तथा पूर्वमन्त्री पुरुषोत्तम पौडेल, केन्द्रीय सदस्यहरू केदार न्यौपाने र अरविन्द सिंह, प्रदेश सचिव मनोज पौडेल, सचिवालय सदस्य जय प्रकाश थारु लगायतका नेता–कार्यकर्ता सहभागी थिए।

सो अवसरमा नेता पुरुषोत्तम पौडेलले भण्डारीलाई “गणतन्त्रको गौरव” भन्दै उनको राष्ट्रपति कार्यकाल र एमाले नेतृत्वमा रहँदा खेलेको भूमिकाको प्रशंसा गरे।

पार्टी नेतृत्वले भण्डारीलाई औपचारिक कार्यक्रममा सहभागी नहुन निर्देशन दिएको भए पनि स्थानीय नेताकार्यकर्ता भने सिमरा पुगेर स्वागतमा जुटेका थिए।