उज्यालो नेपाल अभियानले सामाजिक, आर्थिक र राजनीतिक क्षेत्रमा रुपान्तरण ल्याउने छः कुलमान घिसिङ

काठमाडौं । नेपाल विद्युत प्राधिकरणका पूर्व कार्यकारी निर्देशक कुलमान घिसिङले उज्यालो नेपाल अभियान सामाजिक, आर्थिक र राजनीतिक क्षेत्रमा रुपान्तरणको आधार बन्ने विश्वास व्यक्त गरेका छन्।

शनिबार बेलायत भ्रमण सम्पन्न गरेर स्वदेश फर्कने क्रममा त्रिभुवन अन्तर्राष्ट्रिय विमानस्थलमा पत्रकारहरुसँग कुरा गर्दै उनले उक्त अभियानले युवालाई सबै क्षेत्रमा नेतृत्व गर्न प्रेरित गर्ने बताए।

उनका अनुसार, “यो अभियानले देशभित्र आत्मनिर्भर अर्थतन्त्र निर्माण, रोजगारी सिर्जना र सुशासन कायम गर्न आवश्यक चेतना जगाउनेछ। यसले सही नीति तथा नेतृत्वको लागि दबाब सिर्जना गर्ने भएकाले राष्ट्रिय अभियानको रूपमा अघि बढाउनुपर्छ।”

विदेश भ्रमणबारे उनले भने, “जुन व्यक्ति तथा संस्थाहरुसँग भेटघाट र अन्तरक्रिया भयो, त्यो अत्यन्तै सफल र फलदायी रह्यो। यसले आगामी दिनमा अभियानलाई अघि बढाउन महत्वपूर्ण भूमिका खेल्नेछ।”

उनले विद्युत प्राधिकरणबाट अलग भएपछि विभिन्न संघ–संस्थाले दिएको निमन्त्रणालाई स्वीकार गरेर भ्रमणमा गएको उल्लेख गर्दै, उक्त अवसरमा उज्यालो नेपाल अभियान को उद्देश्यबारे देश–विदेशमा स्पष्ट सन्देश प्रवाह गर्न सफल भएको बताए।

घिसिङले अमेरिकाका ६ स्टेटमा झण्डै १२ वटा कार्यक्रममा सहभागिता जनाउँदै उज्यालो नेपालसँग सम्बन्धित विषयमा व्यापक छलफल, सुझाव र बहस भएको जानकारी दिए।

पत्रकारले रुपन्देहीको चुनावबारे प्रश्न गर्दा उनले अभियान कुनै एक निर्वाचन क्षेत्रका लागि नभएको स्पष्ट पार्दै, “बाहिर रहेका युवाको सोच नै नेपाल रुपान्तरण हुनु पर्छ, अब समृद्धि आउनुपर्छ भन्ने हो,” भने।