काठमाडौं महानगर प्रमुख बालेन साहद्वारा महानगर प्रहरीको प्रशंसा : ‘काम हेर्दा सिनेमा हेरेजस्तो लाग्छ’

काठमाडौं । काठमाडौं महानगरपालिकाका प्रमुख बालेन साहले महानगर प्रहरीको योगदानको प्रशंसा गर्दै राजधानीको सुशासन र व्यवस्थापनमा उनीहरूको भूमिका महत्वपूर्ण रहेको बताएका छन्।

शनिबार काठमाडौंमा आयोजित ३३औं महानगर प्रहरी दिवसको कार्यक्रममा बोल्दै उनले ७५३ स्थानीय तहबीच काठमाडौं महानगरपालिका राजधानीको रूपमा स्थापित हुनुमा महानगर प्रहरीको ठुलो हात रहेको उल्लेख गरे।

उनले भने, “आफूले गरेका धेरै कामहरू सम्झन नसकिँदो रहेछ। तर आज यहाँ प्रस्तुत गरिएका उपलब्धि हेर्दा खुशी लाग्यो। महानगरपालिकाको पहिचान बनाउनमा महानगर प्रहरी बलको विशेष योगदान छ। अन्य धेरै पालिकाले काठमाडौं महानगरबाट सिक्न चाहन्छन्।”

सार्वजनिक सम्पत्ति संरक्षणदेखि अतिक्रमण नियन्त्रण, सुशासन, सुव्यवस्था र अनुगमन कार्यमा पनि महानगर प्रहरी अग्रपंक्तिमा रहेको उनले बताए। बालेनले थपे, “तपाईँहरूको काम हेर्दा कहिलेकाहीँ सिनेमा हेरेजस्तो लाग्छ। उत्कृष्ट भएको छ। यस्ता कामहरूले उदाहरण स्थापित गर्नुपर्छ।”

यस अवसरमा उपप्रमुख सुनिता डंगोलले पनि महानगर प्रहरीलाई नागरिकसँग सबैभन्दा नजिकको संस्था भन्दै प्रशंसा गरिन्। उनले प्रहरी नागरिकको सुख–दुःख, विपत्ति, जात्रा–महोत्सव सबैमा जोडिने भएकाले महानगरपालिकाको प्रतिनिधित्व उनीहरूले गरिरहेको बताइन्।

उनले भनिन्, “संस्थाले योजना अघि बढाउँदा कार्यान्वयनमा तपाईंहरूको भूमिका महत्वपूर्ण हुन्छ। निष्पक्ष भएर जनता र संस्थाको हितका लागि काम गर्नुहुन्छ। त्यसैले तपाईँहरूलाई धन्यवाद दिन चाहन्छु।”

कार्यक्रममा महानगरपालिकाले नगर प्रहरीको योगदानलाई उच्च मूल्याङ्कन गर्दै आगामी दिनमा अझ प्रभावकारी कार्यका लागि प्रोत्साहन गर्ने प्रतिबद्धता जनाएको छ।