नेभिगेशन
देश

‘विद्यार्थीलाई विदेश पलायनबाट रोक्ने निजी विद्यालयप्रति सरकार किन यति कठोर ?’

विद्यालय शिक्षा विधेयकविरुद्ध निजी विद्यालय सञ्चालक आन्दोलित, पाँच बुँदे माग सार्वजनिक

काठमाडौं । सरकारले अघि सारेको विद्यालय शिक्षा विधेयकप्रति निजी विद्यालय सञ्चालकहरूले कडा आपत्ति जनाएका छन्। उनीहरूले विधेयकमा संशोधनको माग गर्दै गत सातादेखि सडक आन्दोलन थालेका हुन्।

आन्दोलनमा सहभागी विनोद देवकोटाले सरकारले तोकेको पूर्ण छात्रवृत्ति प्रावधान हटाउनुपर्ने दाबी गरे। उनका अनुसार विद्यालयहरूले मासिक शुल्क, भर्ना शुल्क र परीक्षा शुल्कमा छुट दिन सक्ने भए पनि पोशाक, स्टेशनरी, खाना वा होस्टलको खर्च नबोक्ने स्पष्ट अडान लिएका छन्। “विद्यालय व्यवसाय कम्पनी ऐनअन्तर्गत सञ्चालित छन्, केही नाफा हुने हिसाबले लगानी गरिएको हो। त्यसैले ‘गैर नाफामूलक’ भन्ने शब्द विधेयकबाट हटाइनुपर्छ,” देवकोटाले भने।

त्यस्तै अर्का शिक्षक रविन शर्माले राज्यले नै सबै सुविधा उपलब्ध गराउन नसक्दा निजी विद्यालयमाथि मात्रै पूरा छात्रवृत्ति र सम्पूर्ण सेवा दिने दायित्व थोपर्नु अन्याय भएको टिप्पणी गरे। उनले विद्यालयलाई गैर नाफामूलक बनाउने प्रयास र १५ प्रतिशत विद्यार्थीलाई पूर्ण छात्रवृत्ति दिनुपर्ने प्रावधान तत्काल खारेज गर्न माग गरे।

शिक्षक संगिता सिलवालले निजी विद्यालयहरूले गुणस्तरीय शिक्षा प्रदान गर्दै आएको र आफ्नै घरजग्गा बेचेर समेत लगानी गर्ने गरेको बताउँदै सरकारले लगाएको नयाँ शर्त अस्वीकार्य रहेको उल्लेख गरिन्। उनले निजी विद्यालयहरूले युवालाई विदेश पलायनबाट रोक्न ठूलो योगदान दिएको दाबी गर्दै सरकारलाई आफ्नो भूमिका बुझ्न आग्रह गरिन्।

निजी विद्यालय सञ्चालकका मुख्य मागहरू :

  • पूर्ण छात्रवृत्ति भन्ने शब्द हटाउनुपर्ने

  • पोशाक, स्टेशनरी, खाना–खाजा जस्ता सामग्री उपलब्ध गराउने प्रावधान खारेज गर्नुपर्ने

  • कम्पनी ऐनअनुसार दर्ता भएका विद्यालयलाई गैर नाफामूलक बनाउनुपर्ने प्रावधान हटाउनुपर्ने

  • छात्रवृत्ति वितरणको अधिकार सम्बन्धित विद्यालयमा रहने व्यवस्था गर्नुपर्ने, आवश्यक परे पालिका प्रतिनिधि समावेश पारदर्शी समितिबाट गर्न सकिने व्यवस्था हुनु पर्ने

  • छात्रवृत्ति ऐन २०२१, नियमावली २०६० र २०७७ को संशोधनमा भएको विभेदकारी प्रावधान खारेज गर्नुपर्ने

निजी विद्यालय सञ्चालकहरूले यी माग पूरा नभएसम्म आन्दोलन जारी रहने चेतावनी दिएका छन्।

प्रकाशित मिति:
प्रतिक्रिया दिनुहोस्