तीन वर्षीया बालिकाको हत्या: सरकार मौन, न्यायकाे माग गर्दै बारा पुगे ऋषि धमला
बारा । जीतपुर-सिमरा उपमहानगरपालिका–१ स्थित तीन वर्षीया बालिका गरिमा चौधरीको बलात्कारपछि क्रूर हत्या भएको घटनाले देशैभर आक्रोशको ज्वाला पैदा भएका बेला स्वतन्त्र नागरिक अभियानका अध्यक्ष ऋषि धमला मैदानमा उत्रिएका छन् । पीडित परिवारलाई न्याय दिलाउन र अपराधीलाई कडाभन्दा कडा कारबाहीको माग गर्दै धमला घटनास्थल बारा पुगेका हुन् ।
घटनास्थल पुगेर अध्यक्ष धमलाले बालिकाको बलात्कारपछि हत्याको घटनाले देशैभरका नागरिकको मुटु छियाछिया भएको बताए ।
‘गरिमा चौधरीको बलात्कार गरी हत्या गरिएको यो जघन्य अपराधमा तीन करोड नेपाली नागरिकको मन रोएको छ,’ भावुक हुँदै धमलाले भने, ‘म तपाईँलाई न्याय दिलाउन यहाँ आएको हो, कसैसामु झुक्दिनँ । निष्पक्ष छानबिन होस्, दोषीमाथि कडा कारबाही होस् र आवश्यक परे ऐन कानुन परिवर्तन गरेर भए पनि फाँसीको व्यवस्था गरियोस् ।’
धमलाले गृहमन्त्री सुधन गुरुङलाई घटनास्थलमा आउन आग्रह गरे । ‘गृहमन्त्रीज्यू ! यहाँ आउनुस्, पीडितहरूको चित्कार र रोदन सुन्नुस्,’ धमलाले भने, ‘नियम–कानुन संशोधन गरेर भए पनि यस्ता बलात्कारी र हत्यारालाई फाँसी दिने व्यवस्था गर्नैपर्छ। स्थानीयको यो मागमा मेरो पूर्ण साथ छ ।’
यसैबीच, घटना भएको ४ दिन बित्दासमेत सरकारले कुनै चासो नदिएको स्थानीयले आरोप लगाएको छ । उनीहरुले प्रधानमन्त्री बालेन्द्र शाह र गृहमन्त्री सुधन गुरुङप्रती घटनामा ध्यान नदिएको भन्दै असन्तुष्टि व्यक्त गरेका छन् ।
