कुलमान घिसिङको भनाइ : “देशमा आशा देखाउनेलाई अझै सम्मान छैन”

दुबई । नेपाल विद्युत् प्राधिकरणका पूर्व कार्यकारी निर्देशक कुलमान घिसिङले देशभित्र आशा र आत्मविश्वास जगाउने व्यक्तिहरूलाई सम्मान गर्ने वातावरण अझै नबनेको बताएका छन्।

मध्यपूर्वको भ्रमणमा रहेका घिसिङले अबुधाबीमा आयोजित एक सम्मान कार्यक्रममा भने, “देशमै केही गर्न सकिन्छ भन्ने विश्वास दिलाउनेलाई हेपिन्छ, यस्तो अवस्थामा युवाले स्वदेशमै टिक्न सक्दैनन्।”

उनले खाडी मुलुकहरूमा पसिना बगाइरहेका नेपालीले पठाउने रेमिट्यान्सले देशको अर्थतन्त्र चलेको भए पनि श्रमिकहरूलाई राज्यले उचित सम्मान गर्न नसकेको गुनासो गरे।

‘उज्यालो अभियान’ बारे जानकारी दिँदै घिसिङले यो अभियान बिजुली मात्र नभई सुशासन, समावेशी सेवा, सामाजिक न्याय र समृद्धिको अभियान भएको बताए। यस्तो रूपान्तरणका लागि नेतृत्व परिवर्तन आवश्यक रहेको उनको भनाइ छ।

युएई भ्रमणको क्रममा विभिन्न नेपाली संघसंस्थाले घिसिङलाई पञ्चेबाजा सहित सम्मान गरेका थिए भने अन्तरक्रियात्मक कार्यक्रमहरू समेत आयोजना गरिएको थियो। साथै, उनले अबुधाबीस्थित नेपाली दूतावासमा पुगेर नेपाली समुदायका समस्या र समाधानका उपायबारे छलफल गरेका थिए।