सिजन मिडियाद्वारा 'एशियन प्रोफेशनल अचिभमेन्ट अवार्ड २०२५' कार्यक्रम घोषणा

काठमाडौं — सामाजिक, साँस्कृतिक, शैक्षिक तथा व्यवसायिक क्षेत्रमा सक्रिय भूमिका निभाउँदै आएको सिजन मिडियाले आफ्नो १७औं स्थापना दिवसको अवसरमा 'एशियन प्रोफेशनल अचिभमेन्ट अवार्ड २०२५' को छैटौं संस्करण आयोजना गर्ने घोषणा गरेको छ।

कम्पनीले भाद्र दोस्रो साता काठमाडौंमा एशियाली मुलुकका सफल व्यवसायिक व्यक्तित्वहरूलाई सम्मान गर्ने कार्यक्रम गर्ने जनाएको छ। कार्यक्रममार्फत विभिन्न क्षेत्रमा सक्रिय तथा सफल व्यक्तिहरूको योगदानलाई उच्च मूल्याङ्कन गर्दै हौसला प्रदान गरिनेछ।

सिजन मिडियाले विगत पाँच वर्षदेखि यस्ता अवार्ड कार्यक्रम गर्दै आएको छ। यस वर्ष भने इभेन्ट्स नेपाल अष्ट्रेलिया र हिमाली कल्चर ग्रुपको सहकार्यमा आगामी सेप्टेम्बरमा अष्ट्रेलियाको मेलबर्नमा पनि सम्मान समारोह आयोजना हुने बताइएको छ।

कार्यक्रम निर्देशक रेजिना तुलाधरले राष्ट्रिय तथा अन्तर्राष्ट्रिय क्षेत्रमा लामो समयदेखि व्यवसाय र सामाजिक क्षेत्रमा सक्रिय रहेका व्यक्तित्वहरूलाई सम्मान गर्ने उद्देश्यले यो कार्यक्रम ल्याइएको जानकारी दिइन्। अवार्डले वरिष्ठहरूलाई सम्मान र नयाँ पुस्तालाई प्रेरणा दिने विश्वास व्यक्त गरिएको छ।