स्वीकृत भाडादरभन्दा सस्तोमा हवाई टिकट बिक्री गर्ने सहमति

काठमाडौं । नजिकिँदो चाडपर्वलाई लक्षित गरी हवाई भाडा बढाइएको गुनासो आएपछि नेपाल नागरिक उड्डयन प्राधिकरण (क्यान)ले आन्तरिक वायुसेवा कम्पनीहरूसँग छलफल गरेको छ ।

प्रधानमन्त्री वालेन्द्र शाहको निर्देशन तथा संस्कृति, पर्यटन तथा नागरिक उड्डयनमन्त्री खडकराज पौडेल (गनेस)को सक्रियतामा नेपाल नागरिक उड्डयन प्राधिकरण (क्यान)ले बिहीबार सम्बन्धित आन्तरिक वायुसेवा कम्पनीका पदाधिकारी तथा प्रतिनिधिलाई बोलाएर हवाई भाडाका विषयमा छलफल गरेको हो ।

छलफलमा क्यान र वायुसेवा कम्पनीबीच स्वीकृत अधिकतम भाडादरभन्दा कम मूल्यमा टिकट बिक्री गर्ने तथा त्यसबारे यात्रुलाई स्पष्ट जानकारी उपलब्ध गराउने सहमति भएको छ । साथै, टिकटको दरबारे सर्वसाधारणलाई स्पष्ट जानकारी दिन सो भाडादर सम्बन्धित वायुसेवा कम्पनीहरूको आधिकारिक बिक्री वितरण प्लेटफर्म (वेबसाइट तथा एप) मा अनिवार्य रूपमा प्रकाशन गर्नुपर्ने सहमतिसमेत जुटेको छ ।