नेपाली खेलकुदले विकासमा नयाँ फड्को मारेको छ : मन्त्री चौधरी

काठमाडौं । युवा तथा खेलकुदमन्त्री तेजुलाल चौधरीले सीमित स्रोत र साधनका बाबजुद नेपाली खेलकुदले राष्ट्रिय तथा अन्तर्राष्ट्रिय स्तरमा महत्वपूर्ण सफलता हासिल गरेको बताएका छन्।

राष्ट्रिय खेलकुद परिषद् (राखेप) को ६२औं वार्षिकोत्सवमा बोल्दै मन्त्री चौधरीले विगत छ दशकमा विभिन्न उतारचढाव पार गर्दै खेलाडीहरूले पदक जितेर नेपालको झण्डा अन्तर्राष्ट्रिय स्तरमा फहराएको र यसले खेलकुदलाई नयाँ फड्को दिलाएको बताए।

“सीमित स्रोत र साधनका बाबजुद नेपाली खेलाडीहरूले राष्ट्रिय र अन्तर्राष्ट्रिय प्रतियोगितामा पदक जित्दै राष्ट्रको शिर उच्च राखेका छन्। यसले खेलकुदको विकासलाई नयाँ स्तरमा पुर्‍याएको छ,” मन्त्री चौधरीले भने।

उनले खेल क्षेत्रमा सरकारले यस वर्ष विगतको तुलनामा बढी बजेट विनियोजन गरेको उल्लेख गर्दै खेलाडीको वृद्धि र विकासमा अझ बढी ध्यान दिनुपर्नेमा जोड दिए।

कार्यक्रममा राखेप अध्यक्ष टंक घिसिङले पनि पछिल्लो वर्ष नेपाली खेलकुदले उल्लेखनीय उपलब्धि हासिल गरेको बताउँदै अन्तर्राष्ट्रिय प्रतियोगितामा सफलता र देशभित्र कार्यक्रमहरूको तीव्रताले खेलकुदको स्तर बढिरहेको टिप्पणी गरे।

उनका अनुसार पछिल्लो आर्थिक वर्ष २०८१/८२ मा भौतिक पूर्वाधार निर्माणमा प्रगति भएको छ भने अब नेपाली खेलकुदलाई विज्ञान र आधुनिक प्रविधिसँग जोडेर विश्वस्तरीय प्रतिस्पर्धामा लैजाने तयारी सुरु भइसकेको छ।