दारिन्जी शेर्पाले गरे किर्गिस्तानको ‘लेनिन चुचुरो’ को दुईपटक सफल आरोहण

काठमाडौं । नेपालका अनुभवी पर्वतारोही दारिन्जी शेर्पाले किर्गिस्तानको सबैभन्दा अग्लो शिखर लेनिन चुचुरो (७,१३४ मिटर) दुई पटक सफलतापूर्वक आरोहण गरेका छन्।

शेर्पाले मध्य एसियाको प्रसिद्ध ट्रान्स अले पर्वत श्रृंखलामा पर्ने यो हिमाललाई ७ अगस्ट र २६ अगस्ट का दिन गरी दुई पटक आरोहण गरेका हुन्। उनले यो आरोहणलाई आफ्नो पर्वतारोहण यात्राको रोमाञ्चक र चुनौतीपूर्ण अनुभवका रूपमा वर्णन गरेका छन्।

लेनिन चुचुरो, जसलाई ‘पीक लेनिन’ नामले पनि चिनिन्छ, किर्गिस्तान र ताजिकिस्तानको सीमामा अवस्थित छ। सन् १९२८ मा पहिलो पटक आरोहण गरिएको यस शिखरलाई आज विश्वभरका पर्वतारोहण प्रेमीहरूको प्रमुख गन्तव्यका रूपमा लिइन्छ।

यद्यपि प्राविधिक हिसाबले यो अत्यन्तै कठिन पर्वत मानिँदैन, यसको उच्च उचाइ, अप्रत्याशित मौसम र लामो आरोहण मार्गका कारण चुनौतीपूर्ण मानिन्छ।

शेर्पाको यस उपलब्धिले नेपाली पर्वतारोहणको अन्तर्राष्ट्रिय प्रतिष्ठा अझ मजबुत बनाएको छ। पाँच पटक सगरमाथा आरोहण गरिसकेका उनले यसपटकको लेनिन चुचुरो आरोहणबाट नेपाली आरोही समुदायलाई थप प्रेरणा दिने विश्वास गरिएको छ।