बारामा बाघको आक्रमणमा एक जनाको मृत्यु

रौतहट । बाराको आधाभार जंगलमा बाघको आक्रमणबाट एक व्यक्तिको ज्यान गएको छ।
प्रहरीका अनुसार मृत्यु हुनेमा जितपुरसिमरा उपमहानगरपालिका–२२, दुई नं. पुल निवासी ५५ वर्षीय कृष्ण प्रसाद शर्मा रहेका छन्।

घाँस काट्न जंगल गएका शर्मा बेलुकीसम्म घर नफर्किएपछि परिवारले खोजी गर्दा आधाभार क्षेत्रमा उनको स्कुटी र घाँस मात्र भेटिएको थियो। त्यसपछि खबर पाउँदा प्रहरी तथा नेपाली सेना घटनास्थल पुगेका थिए।

खोजतलासका क्रममा प्रहरीलाई त्यही क्षेत्रमा चप्पल र रगतका दाग भेटिएको थियो। पछि शर्मा बाघको आक्रमणमा परि मृत्यु भएको अवस्थामा फेला परेका थिए। प्रहरीका अनुसार उनको शवको टाउको नभएको अवस्थामा भेटिएको हो।

मृतकको शवलाई पोस्टमार्टमका लागि प्रदेशिक अस्पताल कलैयामा पठाइएको जिल्ला प्रहरी कार्यालय बाराले जनाएको छ।