सरकारले राख्यो ११ कम्पनीलाई कालोसूचीमा

काठमाडौं।
सरकारले काम सन्तोषजनक ढंगले सम्पन्न नगरेका ११ निर्माण तथा आपूर्ति कम्पनीलाई कालोसूचीमा राखेको छ। प्रधानमन्त्री कार्यालय मातहतको सार्वजनिक खरिद अनुगमन कार्यालयले सोमबार सार्वजनिक सूचना जारी गर्दै ती कम्पनीहरूलाई कालोसूचीमा राखिएको जनाएको हो।

कालोसूचीमा परेका कम्पनीहरूमा बाँकेस्थित शुभ आर.एस. बिल्डर्स सप्लायर्स (मुख्य व्यक्ति रामबहादुर बुढा), अछामको नविन निर्माण सेवा (छत्रबहादुर बुढा), सुर्खेतको जेएमसी कन्स्ट्रक्सन प्रालि (मिथुन चन्द) र काठमाडौंको कास्यम निर्माण सेवा एण्ड सप्लायर्स (माधव घिमिरे) छन्।

त्यसैगरी उदयपुरको विशाल होम निर्माण सेवा (होमबहादुर बस्नेत), बूढानीलकण्ठस्थित जलेश्वरी महादेव यासवि कन्स्ट्रक्सन (सुन्दर श्रेष्ठ), मोरङको सगुन फेब्रिक्स प्रा.लि. (मयंक शाह), काठमाडौंको ग्यालेक्सी कन्स्ट्रक्सन एण्ड सप्लायर्स (कृष्णकुमार राई) र जालपा निर्माण सेवा एण्ड सप्लायर्स (सिताराम श्रेष्ठ) पनि सूचीमा परेका छन्।

यससँगै डोल्पाको मष्टा भवानी निर्माण सेवा (कर्णबहादुर बुढा) र अर्घाखाँचीको शहीद निर्माण सेवा (सहिदिन मियाँ) समेत कालोसूचीमा सूचीकृत भएका छन्।

अनुगमन कार्यालयका अनुसार, कास्यम निर्माण सेवा एण्ड सप्लायर्सलाई दुई वर्षका लागि, मष्टा भवानी निर्माण सेवालाई डेढ वर्षका लागि र बाँकी कम्पनीलाई एक वर्षका लागि कालोसूचीमा राखिएको हो।

कालोसूचीमा परेका कम्पनीहरूले तोकिएको अवधिभर कुनै पनि सार्वजनिक निकायको खरिद प्रक्रियामा सहभागी हुन नपाउने जनाइएको छ।