नीति र नेतृत्वमा व्यापक परिवर्तन बिना समृद्ध नेपाल सम्भव छैन : कुलमान घिसिङ

स्पेन – नेपाल विद्युत् प्राधिकरणका पूर्व कार्यकारी निर्देशक कुलमान घिसिङले समृद्ध नेपाल बनाउनका लागि केवल ऊर्जा क्षेत्रमा मात्र होइन, नीति र नेतृत्वमा समेत व्यापक परिवर्तन आवश्यक रहेको बताएका छन्।

स्पेनको कोष्टाव्लाङ्कामा गैरआवासीय नेपाली संघ (एनआरएनए) र नेपाल समाज एसोसिएसनद्वारा संयुक्त रुपमा आयोजित भेटघाट तथा अन्तरक्रिया कार्यक्रममा बोल्दै उनले सही राजनीतिक नेतृत्व र ठोस नीतिबाट मात्रै देशको समग्र रूपान्तरण सम्भव हुने बताए।

“विदेशमा रहेका नेपालीलाई फर्काउने वातावरण बनाउन, आर्थिक रूपान्तरणलाई गति दिन नेतृत्वमा गम्भीर परिवर्तन चाहिन्छ,” उनले भने। घिसिङले आफू प्राधिकरणमा रहँदा विद्युत् उत्पादन ८०० मेगावाटबाट झन्डै ४ हजार मेगावाटमा पुर्‍याएको, वार्षिक २५ अर्ब राजस्व उठाउन थालेको र प्राधिकरणलाई सबल बनाउन सफल भएको तथ्य प्रस्तुत गरे। “बत्तीको उज्यालो मात्र हैन, मुलुकका सबै क्षेत्रमा उज्यालो पुर्‍याउन ‘उज्यालो नेपाल अभियान’ अघि बढाएको छु,” उनले थपे।

युरोप भ्रमणका क्रममा विभिन्न मुलुकका प्रवासी नेपालीसँग भेटघाट गर्दा सबैले नेपालको विकासमा आफ्नो ज्ञान, अनुभव र लगानी कसरी उपयोग गर्न सकिन्छ भन्ने चासो राखेको उनले बताए। “५० लाखभन्दा बढी नेपाली विदेशमा अनुभव र सीप हासिल गर्दै हुनुहुन्छ। यो सम्पत्ति अब नेपालको रूपान्तरणमा जोडिनु जरुरी छ,” घिसिङले भने। उनले गैरआवासीय नेपाली (एनआरएन) नागरिकता कार्यान्वयनमा ढिलाइ नगरी अगाडि बढाउन पनि आग्रह गरे।

कार्यक्रममा नेपाल समाज एसोसिएसन कोष्टाव्लाङ्काका अध्यक्ष केशर बहादुर थापाले कुलमान घिसिङ जस्ता व्यक्तित्वको अनुभव सुन्न पाउनु गर्वको कुरा भएको उल्लेख गर्दै उज्यालो नेपाल अभियानलाई समर्थन जनाए। एनआरएनए कोष्टाव्लाङ्काका अध्यक्ष विपिन कुमार बिसी लगायतले मन्तव्य व्यक्त गरेका थिए। कार्यक्रममा घिसिङलाई कदरपत्रसहित सम्मान गरिएको थियो भने कलाकार सरोज लामिछानेले सांगीतिक प्रस्तुति दिएका थिए।