१० औं एनएमएसआरए केटिएम कप फुटसल सम्पन्न, एसियन फर्मासिटिकल्स च्याम्पियन

नेपाल औषधि तथा बिक्री प्रतिनिधि संघ (एनएमएसआरए) को आयोजनामा सम्पन्न १० औं केटिएम कप फुटसलमा एसियन फर्मासिटिकल्स विजयी बनेको छ। संघको ५६ औं स्थापना दिवसको अवसरमा आयोजना गरिएको प्रतियोगितामा टिम एनालिया उपविजेतामा सीमित रह्यो।

प्रतियोगितामा सहभागी १० टोलीमध्ये फाइनलमा पुगेका एसियन फर्मासिटिकल्स र टिम एनालियाबीचको खेल निर्धारित समयमा १–१ गोलको बराबरीमा टुंगिएपछि टाइब्रेकमार्फत ४–३ को नतिजासहित एसियनले उपाधि हात पारेको हो। विजेताले नगद रू. ३० हजार प्राप्त गर्दा उपविजेताले रू. २० हजारमा चित्त बुझायो।

व्यक्तिगत श्रेणीमा निजिकलाई बेस्ट गोलकिपर, दिनेशलाई बेस्ट प्लेयर, भोला गुरुङलाई बेस्ट डिफेन्डर र मनिषलाई उच्च गोल स्कोरर घोषित गरियो।

समापन कार्यक्रममा प्रमुख अतिथि युवा तथा खेलकुदमन्त्री तेजुलाल चौधरीले विजेता र उपविजेता टोलीलाई ट्रफी, मेडल र प्रमाणपत्र प्रदान गरे। उनले यस्तो प्रतियोगिताले स्थानीय स्तरमा प्रतिभाशाली खेलाडी उत्पादनमा ठूलो योगदान पुर्‍याउने भन्दै विजेता, उपविजेता टोलीलाई बधाई दिए र आयोजकलाई धन्यवाद ज्ञापन गरे।

संघका केन्द्रीय अध्यक्ष श्याम मण्डलको अध्यक्षतामा भएको कार्यक्रममा प्रतियोगिता व्यवस्थापनमा विशेष योगदान पुर्‍याउने बादल अधिकारी, मनोज शाह र विमल चौधरीलाई सम्मान गरिएको संयोजक कोषराज अवस्थीले जानकारी दिए।

सो अवसरमा चन्द्रागिरी नगरपालिकाका मेयर घनश्याम गिरी, Appone अध्यक्ष बिप्लव अधिकारी, PDAN केन्द्रीय अध्यक्ष गणेश नेपाल, चन्द्रागिरीका विभिन्न वडाध्यक्षहरू, संघका पूर्व कोषाध्यक्ष रुक्मणी शर्मा, समाजसेवी धर्मानन्द श्रेष्ठलगायतको उपस्थिति रहेको थियो।