५६औं स्थापना दिवसको अवसरमा १०औं केटिएम फुटसल कप सुरु

काठमाडौं – नेपाल औषधि तथा बिक्री प्रतिनिधि संघ, काठमाडौं युनिटले आफ्नो ५६औं स्थापना दिवसको अवसरमा १०औं केटिएम फुटसल कप सुरु गरेको छ। दुई दिनसम्म चल्ने यो प्रतियोगिताको उद्घाटन शुक्रबार चन्द्रागिरीस्थित मच्छे नारायण रिक्रिएसन सेन्टरमा सम्पन्न भयो।

प्रतियोगितामा एमआर रोयल्स, ग्यालेक्टिक्स, निभिक्स, एसियन, वेगा, बिवाईसी, थण्डर क्रू, एनालिया, क्वेस्ट र म्याग्नस गरी १० टिम सहभागी छन्।

संघका अध्यक्ष तथा फुटसल कप आयोजक कोषराज अवस्थीका अनुसार प्रथम हुने टिमलाई ३० हजार रुपैयाँ नगदसहित ट्रफी, मेडल र प्रमाणपत्र प्रदान गरिनेछ भने द्वितीय हुने टिमले २० हजार रुपैयाँ नगदसहित ट्रफी, मेडल र प्रमाणपत्र पाउनेछ।

शुक्रबार सम्पन्न लिग चरणका खेलबाट ८ टिम उपाधि प्रतिस्पर्धाका लागि छनोट भइसकेका छन्। प्रतियोगिताको क्वाटरफाइनल, सेमिफाइनल र फाइनल खेल आगामी श्रावण ३१ गते शनिबार हुने तय भएको आयोजकले जनाएको छ।