काठमाडौं महानगरको खेल सम्मानः रवीन्द्र ढाटलाई २ लाख, खोखो उपविजेता टोलीलाई ११–११ लाख

काठमाडौं महानगरपालिकाले म्याट्रिक्स फाइट नाइट १७ (एमएफएन–१७) का च्याम्पियन नेपाली एमएमए फाइटर रवीन्द्र ढाटलाई २ लाख रुपैयाँ प्रदान गर्दै सम्मान गरेको छ। साथै, २०२५ मा सम्पन्न प्रथम खोखो विश्वकपमा उपविजेता बनेका महिला तथा पुरुष टोलीलाई ११–११ लाख रुपैयाँका दरले, कुल २२ लाखको चेकसहित सम्मान गरिएको हो।

खोखोको पुरस्कार रकमको व्यवस्था नेपाल खोखो संघले गर्ने जनाएको छ। सम्मान समारोहमा महानगरका प्रमुख, उपप्रमुख, प्रमुख प्रशासकीय अधिकृत, सामाजिक विकास समितिका संयोजक लगायतको उपस्थिति थियो। यो कार्यक्रम सामाजिक विकास समितिको सिफारिसमा आयोजना गरिएको हो।

समारोहमा बोल्दै सामाजिक विकास समितिका संयोजक रामकुमार केसीले यस्ता उपलब्धिले नेपालको प्रतिष्ठा बढाउने बताए। उनका अनुसार, महानगरले विगतमा पनि राष्ट्रिय टोलीलाई सम्मान गर्दै आएको छ र आगामी दिनमा पनि यसलाई निरन्तरता दिनेछ।

बझाङका रवीन्द्र ढाटले भारतको नोएडामा भएको एमएफएन–१७ मा बान्टमवेट च्याम्पियनशिप जितेका हुन्। उनले फाइनलमा भारतका चोंगरेंग कोरेनलाई तेस्रो राउन्डमा पराजित गर्दै उपाधि हात पारेका थिए। यस जितसँगै उनको व्यावसायिक रेकर्ड ८–१ मा पुगेको छ भने कोरेनको पाँच खेलको जितको क्रम तोडिएको छ। उपाधि जित्ने उनी पहिलो नेपाली फाइटर बनेका छन्।

सम्मानपछि ढाटले काठमाडौं महानगरको यो पहलले आफूलाई थप हौसला दिएको बताए। “खेलाडीको सम्मानले आगामी दिनमा अझ राम्रो प्रदर्शन गर्ने प्रेरणा मिल्छ,” उनले भने।

खोखो विश्वकपमा पुरुष टोलीले नयाँ दिल्लीको इन्दिरा गान्धी इन्डोर हलमा भएको फाइनलमा आयोजक भारतसँग ५४–३६ को अन्तरले हार बेहोरेको थियो। कप्तानले सम्मानले टोलीको मनोबल बढाएको भन्दै आभार व्यक्त गरे। महिला टोली भने फाइनलमा भारतसँग ७८–४० को अन्तरले पराजित भएको थियो।