एनआरएनए अमेरिका अध्यक्ष पदका लागि भानु खरेलको नेतृत्वमा टिमले उम्मेदवारी घोषणा

टेक्सास, अमेरिका — आगामी अगस्ट १६–१७ मा हुने गैरआवासीय नेपाली संघ (एनआरएनए) एनसीसी अमेरिका निर्वाचनका लागि भानु खरेलले औपचारिक रूपमा अध्यक्ष पदमा उम्मेदवारी घोषणा गरेका छन्। टेक्सासको इर्भिङमा शनिबार आयोजित विशेष कार्यक्रममार्फत खरेलले आफ्नो टिमसहित चुनावी अभियानको सुरुवात गरेका हुन्।

हाल एनआरएनए अमेरिकाको उपाध्यक्ष रहेका खरेलले आफ्नो उम्मेदवारीको उद्देश्य अमेरिकास्थित नेपाली समुदायको बौद्धिक, आर्थिक र व्यावसायिक क्षमतालाई नेपालको समृद्धिसँग जोड्ने रहेको बताए। उनले प्रविधि, पर्यटन, रेमिट्यान्स र उद्यमशीलता मार्फत नेपालको विकासमा योगदान दिने रणनीति प्रस्तुत गरे।

खरेलको दृष्टिकोण र प्रतिबद्धता

खरेलका अनुसार, “भारतको आइआइडीएस अध्ययनले सन् २०२२ मा नेपालको सूचना प्रविधि निर्यात ५१५ मिलियन अमेरिकी डलर पुगेको देखाउँछ, जसको ठूलो हिस्सा अमेरिकाबाट आएको हो। २०२३ मा अमेरिकाबाट १.२८ अर्ब डलर रेमिट्यान्स नेपाल पठाइएको तथ्य स्वयंले अमेरिकी नेपाली समुदायको योगदान स्पष्ट गर्छ।”

उनले भूकम्प २०१५ र कोभिड-१९ महामारीको बेला अमेरिकास्थित नेपाली समुदायले पुर्‍याएको योगदानको स्मरण गर्दै आगामी कार्यकालमा थप प्रभावकारी सहभागिता सुनिश्चित गर्ने प्रतिबद्धता जनाए।

चुनाव जितेपछि गरिने प्राथमिक कामहरू

भानु खरेलले अध्यक्षमा निर्वाचित भएमा संस्थाभित्र समावेशिता र पारदर्शिता प्रवर्द्धन गर्ने, महिला र युवा सहभागिता बढाउने, र “एक पटकको नेपाली सधैँको नेपाली” भन्ने नारालाई व्यवहारमा उतार्ने बताए। साथै, उनले एनआरएन नागरिकता र वंशज नागरिकताको निरन्तरताका लागि संस्थागत रूपमा पहल गर्ने प्रतिवद्धता जनाए।

आगामी पाँच वर्षमा नेपालबाट अमेरिकामा हुने आइटी निर्यात दोब्बर पार्ने लक्ष्यसहित कार्य योजना तयार पार्न छुट्टै टास्क फोर्स बनाइने पनि उनले स्पष्ट गरे। पर्यटन, लगानी, उद्यमशीलता प्रवर्द्धन, साना तथा मझौला व्यवसायको सघाउका लागि "नेपाली बिजनेस फोरम" गठनको योजना समेत उनले सार्वजनिक गरे।

समुदायका लागि कार्यक्रम र सुविधाहरू विस्तार

एनआरएनए हेल्पडेस्क हटलाइन, करियर काउन्सेलिङ, रोजगार मेला, सामाजिक–सांस्कृतिक कार्यक्रमहरू मार्फत पहिलो र दोस्रो पुस्ताबीचको अन्तर घटाउने योजना उनले प्रस्तुत गरे। उनले पारदर्शिता र जबाफदेहिता कायम गर्न, नेपाली भाषा–संस्कृति जगेर्ना गर्न र विद्यार्थी समस्यामा संस्थागत पहल गर्न प्रतिबद्धता व्यक्त गरे।

भानु टिमका अन्य उम्मेदवारहरू

कार्यक्रममा खरेल टिमका अन्य उम्मेदवारहरू पनि सार्वजनिक रूपमा वा लिखित सन्देशमार्फत प्रस्तुत भए। वरिष्ठ उपाध्यक्षमा सरोज सिग्देल, उपाध्यक्षमा विष्णु बराल, बल राई, एक देव शर्मा, सी के पराजुली, दुर्गा तिवारी, नवराज न्यौपाने; महासचिवमा अनुप खनाल; सचिवमा वासुदेव भट्ट (खुला), लक्ष्मी थापा (महिला), कोषाध्यक्षमा महेन्द्र बस्नेत, सह-कोषाध्यक्षमा मोहन कुसारी, युवा संयोजकमा बिकी थापा, महिला संयोजकमा सरस्वती शर्मा, आइसिसी सदस्यमा रिता देवी प्रधान र दुर्गा प्याकुरेल, बोर्ड अफ डाइरेक्टर्सका लागि ध्रुव गौतम, हेम बहादुर ठकुला, सुरेन्द्र कुमार अवस्थी, गोविन्द सापकोटा तथा क्षेत्रीय संयोजक (साउथ) मा निश्चल चापागाईं उम्मेदवार रहेका छन्।

सामाजिक अगुवाहरूको समर्थन

कार्यक्रममा युलेस सिटी काउन्सिल सदस्य टिका पौडेल, नेप्लिज सोसाइटी अफ टेक्सासका उपाध्यक्ष जगन भण्डारी, ब्लड डोनर्स अफ अमेरिकाका शिव काफ्ले, जनसम्पर्क समिति अमेरिकाका उपाध्यक्ष भगवान मैनाली, जसस टेक्सासका ज्ञानेन्द्र कार्की, विजय भुसाल लगायतले शुभकामना व्यक्त गरे। कार्यक्रमको सञ्चालन नेपाली समाज टेक्सासका पूर्वअध्यक्ष दिनेश शर्माले गरेका थिए।