एसिया प्यासिफिक युवा वैज्ञानिक सम्मेलन २०२५ मा नेपाली विद्यार्थीको चम्किलो प्रदर्शन, ६ पुरस्कार जिते

काठमाडौं — ताइवानको चुङ युआन क्रिस्चियन विश्वविद्यालयमा सम्पन्न एसिया प्यासिफिक युवा वैज्ञानिक सम्मेलन २०२५ मा नेपालका उच्च माध्यमिक तहका विद्यार्थीहरूले उल्लेखनीय सफलता हासिल गरेका छन्। प्रतियोगितामा सहभागी ११ राष्ट्रबीच नेपालले ६ वटा पुरस्कार जित्दै आफ्नो वैज्ञानिक क्षमताको प्रभावशाली उपस्थिति जनायो।

जीवन विज्ञान विधामा अर्बना स्कूल अफ साइन्स, पुतलीसडकका दीपा बम र श्रीजन ढकाल ले स्वर्ण पदक सहित उत्कृष्ट पोस्टर पुरस्कार प्राप्त गरे। त्यस्तै, सेन्ट लरेन्स कलेज, चाबहिलका निलिमा सुवेदी र गणेश जोती ले रजत पदक तथा उत्कृष्ट पोस्टर को उपाधि हासिल गरे।

त्यही कलेजका कुशल दंगल ले पनि जीवन विज्ञान विधामै कांस्य पदक जित्न सफल भए। साथै, बाल वातावरण विद्यालय, झापाका पल्पाशा श्रेष्ठ र पल लिम्बू ले वातावरण विज्ञान श्रेणीमा विशेष पोस्टर पुरस्कार प्राप्त गरे।

यी सबै विद्यार्थीहरू युनिग्लोब माध्यमिक विद्यालय, कमलादी को सहकार्यमा नेपाल पोलिमर इन्स्टिच्युट द्वारा आयोजित नवौं युवा वैज्ञानिक सम्मेलनमार्फत राष्ट्रिय प्रतिस्पर्धाबाट छानिएका थिए।

सम्मेलन आयोजकहरूका अनुसार, नेपाली विद्यार्थीहरूको यस सफलताले वैज्ञानिक अनुसन्धानप्रतिको उनीहरूको बढ्दो रुचि र अन्तर्राष्ट्रिय मञ्चमा प्रस्तुत हुनसक्ने प्रतिभालाई उजागर गरेको छ।