एक समय धानमा आत्मनिर्भर नेपाल अब आयातमा निर्भर : अध्यक्ष माधव नेपाल

काठमाडौं । नेकपा (एकीकृत समाजवादी) का अध्यक्ष तथा पूर्वप्रधानमन्त्री माधवकुमार नेपालले मुलुकको कृषि प्रणाली आत्मनिर्भर बनाउनुपर्ने आवश्यकता औंल्याएका छन्।

राष्ट्रिय धान दिवसको अवसरमा आयोजित रोपाइँ कार्यक्रमलाई सम्बोधन गर्दै नेता नेपालले अतीतमा नेपाल धानमा आत्मनिर्भर मात्र नभई निर्यात गर्न सक्ने अवस्थामा रहेको स्मरण गरे। तर, अहिलेको अवस्थालाई दुःखद भन्दै उनले चामलसमेत आयात गर्नुपर्ने स्थितिमा पुगिएकोप्रति चिन्ता व्यक्त गरे।

उनले भने, "नेपाल एक कृषिप्रधान देश हो। कृषि क्षेत्रमा आत्मनिर्भर हुन सकिन्छ। अहिलेको अवस्था भने चिन्ताजनक छ – हामी चामलजस्ता आधारभूत कृषि उपजसमेत आयात गर्न बाध्य छौं।"

नेता नेपालले फलफूलजस्ता वस्तु पनि नेपालमै उत्पादन गर्न सकिने स्पष्ट गर्दै यदि उत्पादन वृद्धि गर्न सकियो भने नेपाललाई फलफूल उत्पादन गर्ने प्रमुख देशका रूपमा स्थापित गर्न सकिने धारणा राखे।

उनले थपे, "नेपाल प्राकृतिक स्रोत र साधनमा धनी देश हो, तर त्यसको सही उपयोग गर्न नसक्नु नै पछौटेपनाको मुख्य कारण हो।"

उनका अनुसार नेपालमा कृषि तथा जन्य वस्तु उत्पादनका लागि अपार सम्भावना छ। सांस्कृतिक र प्राकृतिक दृष्टिले नेपाल समृद्ध देश भए पनि योजनाविहीनता र कार्यान्वयनको कमजोरीले गर्दा देश आयातमुखी बन्दै गएको उनले बताए।

अन्त्यमा, उनले कृषिमा आधारित नीति र प्रविधिको प्रयोगमार्फत मुलुकलाई आत्मनिर्भर बनाउने दिशामा सरकारले प्राथमिकता दिनु आवश्यक रहेको धारणा राखे।