शिक्षा समृद्धि र परिवर्तनको मूल आधार हो : मुख्यमन्त्री सिंह

जनकपुर । मधेश प्रदेशका मुख्यमन्त्री सरोजकुमार सिंहले माध्यमिक शिक्षा परीक्षा (एसईई) मा सफल भएका सम्पूर्ण विद्यार्थीहरूलाई बधाई दिंदै उज्ज्वल भविष्यको शुभकामना व्यक्त गरेका छन्। उनले विद्यार्थीहरूको यस उपलब्धिलाई शिक्षाजगतको एक महत्वपूर्ण मोडको रूपमा उल्लेख गर्दै, यो सफलताको पृष्ठभूमिमा उनीहरूको मेहनत, लगनशीलता र निरन्तर प्रयत्न रहेको बताए।

मुख्यमन्त्री सिंहले भने, "तपाईंहरूको प्रयासले प्राप्त यो सफलताले आगामी लक्ष्यहरूतर्फ अघि बढ्न मार्ग प्रशस्त गरेको छ। यो सफलता भविष्यमा अझ ठूला उपलब्धिहरू प्राप्त गर्न प्रेरणादायी बनोस् भन्ने कामना गर्दछु।" उनले विद्यार्थीहरूलाई आत्मविश्वास, अनुशासन र सकारात्मक सोचसहित अगाडि बढ्न सुझाव दिएका छन्। साथै, शिक्षा नै समृद्धि र सामाजिक परिवर्तनको मूल आधार भएको उल्लेख गर्दै समाज, प्रदेश र राष्ट्रको समुन्नत भविष्य निर्माणमा विद्यार्थीहरूको महत्वपूर्ण भूमिका रहने विश्वास व्यक्त गरे।

"विद्यार्थीहरू नै राष्ट्रका आधारस्तम्भ हुन्," मुख्यमन्त्री सिंहले भने, "एसईईको सफलताले तपाईंहरूको आत्मबल अझ बलियो बनोस् र आगामी दिनहरूमा अझ उत्कृष्ट उपलब्धिहरू हासिल गर्न सकोस् भन्ने शुभेच्छा व्यक्त गर्दछु।"