आर्थिक रूपले कमजोर विद्यार्थीलाई मन्त्री तेजुलाल चौधरीबाट सहयोग

युवा तथा खेलकुद मन्त्री तेजुलाल चौधरीले थापाथली क्याम्पसमा अध्ययनरत विद्यार्थी निरज चौधरीलाई आर्थिक सहायता उपलब्ध गराएका छन्।

अटोमोबाइल इन्जिनियरिङको अन्तिम सेमेस्टरमा अध्ययन गरिरहेका निरजलाई प्रोजेक्ट वर्क सम्पन्न गर्नका लागि थारु विद्यार्थी समाजका अध्यक्ष विमल चौधरीको पहलमा सोमबार २५ हजार रुपैयाँ आर्थिक सहयोग गरिएको हो।

निरज चौधरी एक मेधावी, परिश्रमी र समर्पित विद्यार्थी हुन्। उनी हाल क्याम्पसमा पूर्ण छात्रवृत्तिमा अध्ययनरत भए पनि प्रोजेक्टको लागि आवश्यक खर्चको जोहो गर्न नसकेपछि थारु विद्यार्थी समाजमार्फत सहयोगको आग्रह गरेका थिए।

विद्यार्थीको अवस्थाबारे जानकारी पाएपछि अध्यक्ष विमल चौधरीले मन्त्री तेजुलाल चौधरीसँग आर्थिक सहयोगको अनुरोध गरेका थिए, जसपछि मन्त्री चौधरीले आज सहयोग हस्तान्तरण गरेका हुन्।

सहयोगी स्वभावका मन्त्री चौधरी यसअघि पनि विभिन्न कठिनाइमा परेकालाई सहयोग गर्दै आइरहेका छन्।