प्राज्ञिक विद्यार्थी परिषदद्वारा ‘मेरो देश, मेरो जिम्मेवारी’ राष्ट्रव्यापी अभियानको घोषणा

प्राज्ञिक विद्यार्थी परिषद् नेपालले ‘मेरो देश, मेरो जिम्मेवारी’ नामक राष्ट्रव्यापी अभियान सुरु गर्ने घोषणा गरेको छ। आज काठमाडौंमा आयोजित पत्रकार सम्मेलनमा परिषद्को नेतृत्वले अभियानका उद्देश्य र कार्यक्रमसम्बन्धी विवरण सार्वजनिक गरे।

परिषद्का राष्ट्रिय सचिव लोकबहादुर चोयडाको अनुसार अभियान मंसिर २५ गतेदेखि पुस १० गतेसम्म देशभरका ७७ वटै जिल्लामा सञ्चालन हुनेछ। देश विकासका लागि सर्वप्रथम व्यक्तिको सोच र आचरणमा सुधार आवश्यक पर्ने धारणा परिषद्को रहेको उनले बताए।

‘मेरो देश, मेरो जिम्मेवारी’ भन्ने मूल नाराका साथ सुरु गर्न लागिएको यो अभियान सदाचार, सुशासन र सामाजिक सद्भाव प्रवर्द्धनमा केन्द्रित रहने बताइएको छ। अभियानको क्रममा विद्यार्थी, युवा र सर्वसाधारणसहित विभिन्न समूहलाई लक्षित गर्दै विविध कार्यक्रम तथा गतिविधि सञ्चालन गरिनेछ।

अभियानअन्तर्गत देशका युवा र विद्यार्थीहरूबाट सुझाव संकलन, राष्ट्रप्रतिको कर्तव्यबोध जगाउने कार्यक्रम, साहित्य, पर्चा र पोस्टर वितरणमार्फत नागरिक कर्तव्यबारे स्पष्ट धारणा निर्माण गर्ने जस्ता गतिविधि रहने जनाइएको छ।

सकारात्मक सोच, जिम्मेवारी बोध र राष्ट्रप्रेम अभिवृद्धि गर्ने उद्देश्यले राष्ट्रियस्तरमा सचेतना कार्यक्रम र गतिविधि सञ्चालन गरिने परिषद्ले बताएको छ। कार्यक्रममा बागमती प्रदेश सहसचिव निर्मल खड्का, परिषद्को पूर्व राष्ट्रिय सचिव शृष्टि जोशीलगायतको उपस्थिति थियो।