सुस्तश्रवण युवाका लागि क्षमता अभिवृद्धि तालिम सम्पन्न, प्रतिवेदन तथा पैरवी कार्यक्रम पनि गरियो

श्रुति संस्थाले सुस्तश्रवण युवाहरूको रोजगारी तथा स्वरोजगार क्षेत्रमा क्षमता अभिवृद्धि गर्ने उद्देश्यले सञ्चालन गरेको तालिम सम्पन्न भएको छ। अविलिस फाउन्डेसनको आर्थिक सहयोगमा सञ्चालित परियोजनाअन्तर्गत शुक्रबार प्रतिवेदन प्रस्तुतीकरण तथा पैरवी कार्यक्रम आयोजित गरिएको थियो।

कार्यक्रममा संस्थाकी अध्यक्ष निता केशरी भट्टराईले परियोजनासम्बन्धी विवरण प्रस्तुत गर्दै देशका विभिन्न स्थानमा गएर सुस्तश्रवण व्यक्ति तथा संस्थाहरूका अवस्थाबारे अध्ययन गरिएको जानकारी दिइन्। उनले बुटवल, पोखरा र धनगढीसहितका स्थानमा रहेका सुस्तश्रवण समुदायले भोग्दै आएका चुनौतीहरूको समेत अवलोकन गरिएको बताइन्।

कार्यक्रममा सहभागी सुस्तश्रवण युवा–युवतीहरूले प्राप्त तालिम, रोजगारी खोज्दा सामना गर्नुपरेका कठिनाइ, रोजगारी पाएपछि गरेका संघर्ष र हासिल गरेका सफलताबारे आफ्ना अनुभवहरू साझा गरे। ममता महर्जनले तालिम लिएको भए पनि सुस्तश्रवण व्यक्तिका लागि रोजगारी पाउनु अझै चुनौतीपूर्ण रहेको बताइन्। यस्तै, समीक्षा घिमिरे र दिनेश चौधरीले पनि तालिमपछि अनुभूत गरेका वास्तविक अवस्थाबारे अनुभव प्रस्तुत गरे।

कार्यक्रममा काठमाडौं महानगरपालिकाको सामाजिक विकास विभागकी प्रमुख समीक्षा निरौलाले सुस्तश्रवण व्यक्तिहरूको समस्या समाधान तथा रोजगारी सुनिश्चितताका लागि महानगरपालिका प्रतिबद्ध रहेको बताइन्। उनले महानगरपालिकाले तेस्रो वर्षदेखि सिपमूलक तालिम कार्यक्रम संचालन गर्दै आएको उल्लेख गर्दै प्रशिक्षार्थीहरूलाई औद्योगिक प्रतिष्ठानसँग समन्वय गरी रोजगारी प्लेसमेन्टमा सहयोग गरिँदै आएको जानकारी दिइन्। निरौलाले दोभाषे तथा क्याप्सनिङ सेवाको पहुँच विस्तार गर्दै लगिने समेत बताइन्।

यसैगरी, कार्यक्रममा गोपाल बहादुर खड्काले युवा तथा साना व्यवसायी कोषबारे जानकारी प्रस्तुत गरे भने डा. बिरेन्द्रराज पोखरेलले अपांगता भएका व्यक्तिका अधिकारसम्बन्धी अन्तर्राष्ट्रिय महासन्धि (सीआरपीडी) का प्रावधानहरूबारे प्रस्तुति दिए।

अपांगता क्षेत्रका युवाहरूको उल्लेखनीय सहभागितामा सम्पन्न भएको कार्यक्रम महेश्वर घिमिरेले संचालन गरेका थिए।