सांसद मेटमणि चौधरी विरुद्ध चेक बाउन्सको जाहेरी, प्रहरी अनुसन्धानको प्रक्रिया अघि बढ्दै

नेकपा (एकीकृत समाजवादी)का उपमहासचिव तथा प्रतिनिधिसभा सांसद मेटमणि चौधरीविरुद्ध जिल्ला प्रहरी कार्यालय दाङमा चेक अनादर सम्बन्धी जाहेरी दर्ता गरिएको छ। उनी हालैको आम निर्वाचनमा दाङ क्षेत्र नं. १ बाट प्रतिनिधिसभा सदस्यमा विजयी भएका थिए।

कार्यालय प्रमुख एसपी अर्जुनप्रसाद तिमिल्सिनाका अनुसार बुधबार हुलाकमार्फत आएको उजुरीमा चौधरीले एभरेस्ट बैंकमार्फत जारी गरेको पाँच करोड चालीस लाख रुपैयाँको चेक अस्वीकृत (बाउन्स) भएको उल्लेख छ। उनले भने, "हुलाकमार्फत चेक अनादरको जाहेरी आएको छ, अहिले हामी छलफलको चरणमा छौं।"

लुम्बिनी प्रदेश प्रहरी कार्यालयको उच्च स्रोतले दिएको जानकारी अनुसार रोल्पाका ठेकेदार धात बुढामगरले सांसद चौधरीविरुद्ध उजुरी दिएका हुन्। प्रहरीका अनुसार, जाहेरी सनाखतको प्रक्रियाका लागि उजुरीकर्ता बुढामगरलाई प्रहरी कार्यालयमा बोलाइएको छ।

प्रहरी स्रोतले भन्यो, “सनाखतपछि अनुसन्धान प्रक्रिया औपचारिक रूपमा अघि बढ्छ। प्रारम्भिक विवरणअनुसार हस्ताक्षर नमिलेकै कारण चेक बाउन्स भएको भनिएको छ, हामी यसबारे विस्तृत रुपमा अध्ययन गरिरहेका छौं।”

उक्त घटनाबारे प्रतिक्रिया लिन चौधरीसँग सम्पर्क प्रयास गरिए पनि उनले फोन नउठाएको जनाइएको छ।