राष्ट्रिय थारु कलाकार मञ्चद्वारा काठमाडौंमा बृहत राष्ट्रिय थारु सांस्कृतिक कार्यक्रम, तयारी पूरा हुँदै

काठमाडौं, ३० जेठ – थारु भाषा, कला र संस्कृतिको संरक्षण र प्रवर्द्धन गर्ने उद्देश्यका साथ राष्ट्रिय थारु कलाकार मञ्चले काठमाडौंमा बृहत राष्ट्रिय थारु सांस्कृतिक कार्यक्रमको आयोजना गर्न लागेको छ। “थारु भाषा, कला–संस्कृति हमर शान, पहिचान बचैना हमार अभियान” भन्ने मूल नारासहित कार्यक्रम आगामी असार ७ गते कमलादीस्थित नेपाल प्रज्ञा प्रतिष्ठानको हलमा सम्पन्न हुने मञ्चले जानकारी दिएको छ। उक्त कार्यक्रममा संस्कृति, पर्यटन तथा नागरिक उड्डयन मन्त्रालयका राज्यमन्त्री अरुण कुमार चौधरी प्रमुख अतिथि रहनेछन्।

आयोजक टिमले आज राज्यमन्त्री चौधरीलाई भेट गरी विशेष निमन्त्रणा पनि हस्तान्तरण गरिसकेको छ। देशका विभिन्न स्थानबाट १०० भन्दा बढी थारु कलाकारहरूको सहभागिता रहने कार्यक्रम थारु समुदायको मौलिक नृत्य, गीत, परम्परागत नाट्य प्रस्तुति र थारु भेषभूषामा सजिएका कलाकारहरूको आकर्षक प्रस्तुतीले भरिपूर्ण हुने आयोजकले जनाएको छ। विशेषगरी धुम्रा नाच, झुम्रा, मघौटा लगायत थारु सांस्कृतिक नाचहरू प्रस्तुत गरिनेछन्। यसका अतिरिक्त, कार्यक्रममा थारु परिकारहरूको स्वाद लिन सकिने स्टल, थारु परम्परागत लुगा, गहना र सांस्कृतिक सामाग्रीहरूको प्रदर्शनी पनि राखिनेछ। राष्ट्रिय स्तरमा थारु कलाकारहरूको उपस्थितिमा पहिलो पटक यस्तो बृहत सांस्कृतिक कार्यक्रम हुन लागेको मञ्चका अध्यक्ष विनय बैद्यले जानकारी दिए। उनले यो कार्यक्रम केवल मनोरञ्जनको माध्यम नभई थारु पहिचानको संरक्षण र सशक्तिकरणतर्फको सार्थक प्रयास भएको बताए।

मञ्चका महासचिव विजय चौधरीले कार्यक्रमलाई भव्य र सुसंस्कृत बनाउन सम्पूर्ण थारु संघसंस्था, संस्कृति प्रेमी र सरोकारवालालाई सहभागी हुन अपिल गरेका छन्। कार्यक्रममा सहभागिताका लागि प्रवेश शुल्क १,००० रुपैयाँ तोकिएको छ भने टिकटको प्रि–बुकिङ खुला भइसकेको र कार्यक्रम स्थलमै पनि टिकट उपलब्ध हुने उनले जानकारी दिए।

कार्यक्रमबारे विस्तृत जानकारी आगामी असार १ गते, आइतबार नेपाल पर्यटन बोर्डमा पत्रकार सम्मेलनमार्फत सार्वजनिक गरिने आयोजकले जनाएको छ।