त्रिवि स्नातक तहमा भर्ना रोक्दा विद्यार्थी अन्यायमा परेको स्वतन्त्र विद्यार्थी युनियनको आरोप

त्रिभुवन विश्वविद्यालयले स्नातक तहको भर्ना प्रक्रिया रोकेको भन्दै स्वतन्त्र विद्यार्थी युनियनका नेताहरूले आपत्ति जनाएका छन्। आज काठमाडौंमा पत्रकार सम्मेलन गरी उनीहरूले भर्ना रोक्ने निर्णय विद्यार्थीविरोधी भएको बताउँदै उक्त निर्णय तत्काल फिर्ता लिन माग गरेका हुन्।उनीहरूका अनुसार, स्वतन्त्र विद्यार्थी युनियनको निर्वाचनका कारण २०८१ साल माघ ११ गतेदेखि त्रिवि आंगिक क्याम्पसमा स्नातक तहको प्रथम वर्षमा भर्ना रोकिएको छ। यसले हजारौं विद्यार्थीको भविष्यमा गम्भीर असर परेको स्ववियू नेताहरूको भनाइ छ।

शंकरदेव क्याम्पसका स्ववियू सचिव मदनराज उपाध्यायले भने, "ब्याचलर तहमा समेष्टर प्रणाली नभएकोले जतिबेला पनि भर्ना खुल्न सक्ने अवस्था हुँदाहुँदै पनि त्रिविले भर्ना नखोलेको हो। अघिल्ला वर्षहरूमा विद्यार्थीहरूले साउनसम्म भर्ना हुने गर्थे, तर यसपालि चारदेखि पाँच हजार विद्यार्थी भर्ना हुनै पाएका छैनन् " । उनीहरूले त्रिविका पदाधिकारीहरू— उपकुलपति, रेक्टर र रजिष्ट्रार—ले एकल निर्णयमार्फत भर्ना प्रक्रिया रोकेको आरोप समेत लगाए। शंकरदेव क्याम्पसमा अघिल्ला वर्षमा ३ देखि ४ हजारसम्म विद्यार्थी भर्ना हुने गरेकोमा हाल जम्मा १,५۰۰ मात्र भर्ना भएको पनि उपाध्यायले जानकारी दिए। त्रिविबाट सम्बन्धन प्राप्त केही निजी तथा सामुदायिक क्याम्पसहरूले भने अहिले पनि स्नातक तहमा भर्ना लिइरहेको उनीहरूको भनाइ छ। तर आंगिक क्याम्पसहरूमा मात्र भर्ना रोकिँदा भेदभावपूर्ण व्यवहार भएको उनीहरूको आरोप छ। पत्रकार सम्मेलनमा सहभागी विद्यार्थी नेताहरूले त्रिविका सबै क्याम्पसमा भर्ना पुनः खोल्न माग गरे। साथै, विद्यार्थीलाई अध्ययन गर्ने अधिकारबाट वञ्चित नगर्न त्रिविलाई आग्रह गरे।

कार्यक्रममा शंकरदेव क्याम्पसका स्ववियू सभापति सुशान्त बस्नेत, पब्लिक युथ क्याम्पसका सन्तोष श्रेष्ठ, कैलाशकुट क्याम्पसका सुवर्ण गौतम, भक्तपुर क्याम्पसका पुकार पराजुली, थली क्याम्पसका अंशु फुँयाललगायतका नेताहरूको उपस्थिति थियो। स्ववियू नेताहरूले त्रिविले पटक–पटक शैक्षिक क्यालेण्डरको उल्लङ्घन गरेको भन्दै आलोचना गर्दै, भर्ना नखुल्दा रजिष्ट्रेसन खुलेको भए पनि त्यसको कुनै अर्थ नहुने बताए। साथै, यस्तो अवस्थाको अन्त्य गरिनुपर्ने उनीहरूको माग छ।