सरकारसँग छलफलपछि निजी क्षेत्र आशावादी

काठमाडौं।
प्रधानमन्त्री कार्यालय सिंहदरबारमा आइतबार नेपाल उद्योग वाणिज्य महासंघ, उद्योग व्यवसायी संघ तथा जेनजी आन्दोलनबाट प्रभावित व्यवसायीबीच भएको छलफलपछि निजी क्षेत्रले आफूलाई सकारात्मक र आशावादी महसुस गरेको जनाएको छ।

आन्दोलनका क्रममा आगजनी, तोडफोड र लुटपाटका कारण क्षति पुगेका उद्योग–व्यवसायसम्बन्धी विषयमा प्रधानमन्त्रीसहित अर्थमन्त्री र गृहमन्त्रीसँग प्रत्यक्ष छलफल भएको थियो।

छलफलपछि सञ्चारकर्मीहरूसँग कुरा गर्दै नेपाल उद्योग वाणिज्य महासंघका अध्यक्ष चन्द्रप्रसाद ढकालले उच्च सरकारी नेतृत्वले निजी क्षेत्रको पीडा गम्भीरतापूर्वक सुनेको बताए। “हामीले उद्योग प्रतिष्ठान र निजी सम्पत्तिमा भएको क्षतिको विषयमा प्रधानमन्त्रीसँग प्रत्यक्ष कुरा राख्यौं। उहाँहरूको प्रतिक्रिया सकारात्मक रह्यो,” उनले भने।

ढकालका अनुसार छलफलमा निजी क्षेत्रका प्रतिनिधिहरूले आफ्ना समस्या र धारणा खुलाएर प्रस्तुत गरेका थिए। सरकारको तर्फबाट भने क्षतिग्रस्त उद्योग–व्यवसायलाई आवश्यक सहयोग गर्ने र समस्या समाधानमा साथ दिने प्रतिबद्धता व्यक्त गरिएको छ।

प्रधानमन्त्रीको आश्वासनपछि निजी क्षेत्रले आगामी दिनमा समस्याको उचित समाधान हुने विश्वास लिएको महासंघ अध्यक्ष ढकालले बताए।