सहिद विजय चौधरीको परिवारलाई सङ्घीय र स्थानीय सरकारको सहयोग

सिरहा । काठमाडौंमा ‘जेन–जी’ आन्दोलनका क्रममा प्रहरीको गोली लागी ज्यान गुमाएका लहान नगरपालिका–१५, सिमलटोकीका विजय चौधरीलाई संघीय सरकारले सहिद घोषणा गरेको छ । साथै, लहान नगरपालिकाले पनि उनका परिवारका लागि राहत, शिक्षा र रोजगारीसम्बन्धी विशेष प्याकेज सार्वजनिक गरेको छ ।

नगरपालिकाले तत्कालका लागि चौधरी परिवारलाई एक लाख रुपैयाँ राहत रकम दिने निर्णय गरेको छ । नगरप्रमुख महेशप्रसाद चौधरीले जानकारी दिँदै, सहिद चौधरीकी चार वर्षीया छोरीलाई कक्षा १२ सम्म निःशुल्क शिक्षा र उनकी श्रीमतीलाई योग्यताअनुसार नगरपालिकामा रोजगारी उपलब्ध गराइने बताए ।

यसअघि संघीय सरकारले आन्दोलनमा ज्यान गुमाउनेलाई सहिद घोषणा गर्दै प्रत्येक पीडित परिवारलाई १५ लाख रुपैयाँ दिने निर्णय गरिसकेको छ ।

गत भदौ २३ गते काठमाडौंमा भएको प्रदर्शनमा प्रहरीको गोली लागी २७ वर्षीय चौधरीको मृत्यु भएको थियो । घटनाको नौ दिनपछि मंगलबार उनकाे गाउँमा अन्तिम संस्कार सम्पन्न गरिएको हो ।