मुस्लिम धर्मावलम्बीमाथि अमानवीय व्यवहार गर्नेलाई हदैसम्मको कारबाहीको माग

सामान्य आर्थिक लेनदेनका विषयमा उत्पन्न विवादका कारण तस्लिम अन्सारी र सलिम अन्सारीमाथि सुँगुर पालन गर्ने खोरभित्र थुनेर निर्घात कुटपिट गर्दै अमानवीय व्यवहार गरिएको भन्दै सरोकारवाला पक्षले दोषीमाथि कडा कारबाहीको माग गरेका छन् । आज काठमाडौंमा आयोजित पत्रकार सम्मेलनमार्फत् उनीहरुले उक्त घटना सर्लाही जिल्लाको सिमानामा पर्ने पर्सा गाउँपालिका–५ मा घटेको र यो कार्य पूर्णरूपमा आपराधिक तथा अनैतिक भएको बताएका हुन् ।

वरिष्ठ अधिवक्ता डा. सुरेन्द्र भण्डारीले सो घटनामा सम्लग्न व्यक्तिहरुलाई कानूनी प्रक्रियामा ल्याएर आवश्यक कारबाही गर्नुपर्ने धारणा व्यक्त गरे । ‘यस्ता कार्यमा संलग्न जो–कोहीलाई कानूनी उत्तरदायित्वमा ल्याउनु अनिवार्य छ,’ उनले उल्लेख गरे ।

नेपाली सेनाका पूर्व जर्नेल डा. प्रेमसिंह बस्नेतले प्रहरी प्रशासन र कानूनी प्रक्रिया बेवास्ता गर्दै कसैलाई सुँगुरको खोरमा थुनिनु गम्भीर आपराधिक कार्य भएको टिप्पणी गरे। मुस्लिम समुदायमा सुँगुर अपवित्र मानिने भएकाले यस्तो कार्य उनीहरूका धार्मिक मान्यताविपरीत रहेको भन्दै उनले यसको कडा भर्त्सना गरे।

त्यस्तै, मुस्लिम अभियन्ता ताज मोहम्मद मियाँले मुस्लिम समुदायलाई लक्षित गर्दै पटक–पटक यस्ता घटनाहरू घटिरहेको गुनासो व्यक्त गरे। पछिल्ला केही महिनाका घटनाक्रमहरू हेर्दा मुस्लिमविरुद्ध भडकाउ अभिव्यक्ति र अमानवीय व्यवहार गरिएको देखिएको भन्दै उनले चिन्ता व्यक्त गरे। यस्ता परिस्थितिमा राज्यको मौनताप्रति आपत्ति जनाउँदै, उनले मुस्लिम समुदाय यस्ता चुनौतीहरूबाट विचलित नहुने र दृढताका साथ सामना गर्ने अठोट दोहोर्‍याए।