आगामी फागुन २१ मा हुने चुनाव सफल बनाउन सबैलाई राष्ट्रपतिको अपिल

काठमाडौं । राष्ट्रपति रामचन्द्र पौडेलले फागुन २१ गते हुने प्रतिनिधिसभा निर्वाचनलाई सफल बनाउन सबै पक्षलाई सहयोग गर्न अपिल गरेका छन्।

शनिबार वक्तव्य जारी गर्दै राष्ट्रपति पौडेलले गम्भीर परिस्थितिबीच प्राप्त भएको अवसरलाई सदुपयोग गर्दै चुनाव सम्पन्न गराउन राजनीतिक दल, सरोकारवाला निकाय र नागरिक समाज सबै जिम्मेवार बन्नुपर्ने आवश्यकता औंल्याएका छन्।

वक्तव्यमा उनले भनेका छन्, “देश अत्यन्त असहज र चुनौतीपूर्ण अवस्थामा रहे पनि कठिन प्रयासपछि शान्तिपूर्ण निकास सम्भव भएको छ। संविधान सुरक्षित छ, संसदीय प्रणाली जोगिएको छ र संघीय लोकतान्त्रिक गणतन्त्र कायम छ। अब छ महिनाभित्रै हुने प्रतिनिधिसभा निर्वाचनमार्फत जनताले अझ सबल लोकतन्त्रको बाटोमा अघि बढ्ने अवसर पाएका छन्।”