नवनियुक्त प्रधानमन्त्री कार्कीको शपथग्रहणलगत्तै प्रतिनिधि सभा विघटन

काठमाडौं । देशले पहिलो महिला प्रधानमन्त्री पाएको केही क्षणमै प्रतिनिधि सभा विघटन गरिएको छ। नयाँ प्रधानमन्त्री सुशीला कार्कीले शुक्रबार शपथग्रहण गरेलगत्तै प्रतिनिधि सभा विघटनको सिफारिस राष्ट्रपति समक्ष पेश गरेकी हुन्।

प्रधानमन्त्री कार्कीको सिफारिसअनुसार राष्ट्रपति रामचन्द्र पौडेलले भदौ २७ गते शुक्रबार राति ११ बजेदेखि लागू हुने गरी वर्तमान प्रतिनिधि सभा विघटनको घोषणा गरेका हुन्। राष्ट्रपति कार्यालयका उपसचिव रुपेशजङ्ग थापामगरले जानकारी दिएअनुसार आगामी प्रतिनिधि सभा निर्वाचन २०८२ साल फागुन २१ गते बिहीबार तोकिएको छ।

भदौ २३ र २४ गते जेनजी अभियानको आन्दोलनपछि नेपाली कांग्रेस र एमाले नेतृत्वको गठबन्धन सरकार ढलेसँगै संघीय लोकतान्त्रिक गणतन्त्र नेपालले कार्कीमार्फत पहिलो महिला प्रधानमन्त्री पाएको हो।

राष्ट्रपति कार्यालयमा शुक्रबार राष्ट्रपति पौडेल, नेपाली सेनाका प्रधान सेनापति अशोकराज सिग्देल, जेनजी अभियानका प्रतिनिधि तथा सरोकारवालाबीचको परामर्शपछि नयाँ सरकारको नेतृत्व कार्कीलाई दिइएको हो।