प्रशंसा संरक्षण समाज र सुदूरपश्चिम कलाकार समाजद्वारा गौरा पर्वको अवसरमा सांस्कृतिक कार्यक्रम आयोजना

काठमाडौं, १३ भदौ । प्रशंसा संरक्षण समाज र सुदूरपश्चिम कलाकार समाजले गौरा पर्वको अवसरमा विशेष सांस्कृतिक कार्यक्रम आयोजना गर्ने भएका छन्। शुक्रबार रिपोर्टर्स क्लब नेपालमा आयोजित पत्रकार सम्मेलनमार्फत यसबारे जानकारी दिइएको हो।

सुदूरपश्चिम कलाकार समाजका अध्यक्ष सुरेश बोहोराका अनुसार कार्यक्रम भदौ १४ र १५ गते टुडिखेलमा आयोजना हुनेछ। उनले गौरा सुदूरपश्चिमको मौलिक पर्व भएको उल्लेख गर्दै यसलाई सांस्कृतिक माध्यमबाट देशभर प्रचार–प्रसार गर्ने उद्देश्य रहेको बताए।

कार्यक्रमअन्तर्गत १४ गते सुदूरपश्चिमका कलाकारहरूको प्रस्तुति रहने छ भने १५ गते गौराको पूजाआराधना र मौलिक नृत्य प्रदर्शन गरिने बताइएको छ। पत्रकार सम्मेलनमा सुदूरपश्चिम कलाकार समाजका अध्यक्ष बोहोरा, प्रशंसा संरक्षण समाजका अध्यक्ष हरि अगस्ती, यज्ञराज उपाध्यायलगायतको उपस्थिति रहेको थियो।