नेप्से परिसूचक ११.७७ अंकले बढ्यो, कारोबार रकम भने खुम्चियो

काठमाडौं। बिहीबार नेप्से परिसूचक दोहोरो अंकले बढेर बन्द भएको छ। नेप्से परिसूचक ११.७७ अंकले बढेर २६२९.८१ विन्दुमा उक्लिएको हो। अघिल्लो दिन बुधबार नेप्से परिसूचक ३६.२५ अंकले घटेर २६१८.०३ विन्दुमा पुगेको थियो।

नेप्से बढेपनि कारोबार रकममा भने बुधबारको तुलनामा कमी आएको छ। यसदिन ३५६ वटा स्क्रिप्सको १ करोड ७२ लाख ७० हजार ४४९ कित्ता सेयर ५ अर्ब ४४ करोड ७३ लाख १३ हजार १६८ रुपैायाँमा खरिदबिक्री भए। बुधबार ६ अर्ब ३५ करोड मूल्य बराबरको कारोबार भएको थियो।

कारोबारमा आएकामध्ये १७६ वटा स्टक्सको मूल्य बढ्दा ९५ वटाको घट्यो। ७ वटा स्टक्सको मूल्य भने स्थिर रह्यो। नेप्से परिसूचक दोहोरो अंकले बढेपनि कुनै पनि कम्पनीको सेयर सकारात्मक सर्किट लेभलमा कारोबार हुन सकेन।