ब्लु डायमन्ड सोसाइटीकी पूर्व अध्यक्ष गुरुङमाथि समुदायका सदस्यहरूबाट ठगीको आरोप

काठमाडौं, १३ भदौ । ब्लु डायमन्ड सोसाइटीकी पूर्व अध्यक्ष सञ्जिव (पिंकी) गुरुङले हाइड्रोपावरमा लगानी गरिदिने प्रलोभन देखाएर लैङ्गिक तथा यौनिक अल्पसंख्यक समुदायका सदस्यहरूबाट रकम उठाएको तथ्य सार्वजनिक भएको छ।

काठमाडौंमा आज पत्रकार सम्मेलन गर्दै पीडितहरूले गुरुङले करिब २०७४ सालतिर ६०–७० जनाबाट प्रतिव्यक्ति ५ हजारदेखि ३ लाख रुपैयाँसम्म असुल गरेको बताएका छन्।

पीडितका अनुसार गुरुङले स्वयं जिल्ला प्रहरी परिसर काठमाडौं र जिल्ला सरकारी वकिल कार्यालयमा उपस्थित भएर ‘विवेकशील आदर्श इन्भेस्टमेन्ट कम्पनी’ को नाममा शेयरका लागि रकम संकलन गरेको स्वीकार समेत गरिसकेकी थिइन्। तर, करिब सात वर्षपछि उनले ‘इनर्जी इन्जिनियरिङ प्रा.लि.’ नामक अर्को कम्पनीमार्फत शंकास्पद शेयर प्रमाणपत्र वितरण गर्दै समुदायलाई फेरि झुक्याउने प्रयास गरेको पीडितहरूको आरोप छ।

उनीहरूले विवेकशील आदर्श इन्भेस्टमेन्ट कम्पनीको आधिकारिक शेयर प्रमाणपत्र उपलब्ध गराउन वा संकलित रकम तत्काल फिर्ता गर्न गुरुङलाई चेतावनी दिएका छन्। माग ७ दिनभित्र पूरा नभए कानुनी बाटो अपनाउने चेतावनीसमेत पीडितहरूले दिएका छन्।