नेपाली एनिमेटेड चलचित्र ‘जय लाखय्’ भाद्र १४ गते प्रिमियर हुँदै

काठमाडौं । यंत्रकलाको ब्यानरमा तयार गरिएको नेपाली एनिमेटेड चलचित्र ‘जय लाखय्’ आगामी भाद्र १४ गते चाबहिलस्थित एफक्यूब सिनेमा, केएल टावरमा प्रिमियर हुने भएको छ।

आठ वर्षको मेहनतपछि बनेको यस चलचित्रले नेवार समुदायमा लाखेको ऐतिहासिक महत्त्वलाई केन्द्रमा राखेको छ। इन्द्र जात्राको सन्दर्भसँगै नेपालको सांस्कृतिक सम्पदालाई नयाँ पुस्ता तथा अन्तर्राष्ट्रिय दर्शकमाझ पुर्याउने लक्ष्य चलचित्रले लिएको छ।

यसअघि यंत्रकलाले नेपालकै पहिलो एनिमेसन चलचित्र ‘शंखधर’ सार्वजनिक गरेको थियो। संस्कृतिविद् स्व. सत्य मोहन जोशीको कथा, संवाद र पटकथामा आधारित ‘जय लाखय्’को सम्पादन तथा निर्देशन संयुक्त श्रेष्ठले गरेका छन्। एनिमेशन भने संयुक्त र नियुक्त श्रेष्ठले गरेका हुन्।

चलचित्रका निर्मातामा बेलायतस्थित अञ्जना श्रेष्ठ र लोचन मानन्धर, तथा अमेरिकाबाट शैलेन्द्र मानन्धर र समीर महर्जन रहेका छन्। गुठी अष्ट्रेलियाले प्रस्तुत गरेको चलचित्रमा नेपाल ललितकला प्रतिष्ठान, नेपालभाषा एकेडेमी, नेपालभाषा टाइम्स, विश्व नेवाः संगठन र ज्यासः फिल्म्सको सहकार्य छ।

नेपालभाषा र नेपाली दुवै भाषामा निर्मित यस चलचित्रमा प्रधानमन्त्री जंगबहादुर राणाको बेलायत भ्रमणसम्बन्धी ऐतिहासिक प्रसंग पनि पहिलोपटक पर्दामा देख्न पाइनेछ।

प्रिमियर शो भाद्र १४ गते बिहान ९ बजे नेपालभाषामा र ९:१५ बजे नेपाली भाषामा प्रदर्शन हुने कार्यक्रम तय गरिएको छ।