कृषिमन्त्री गीता चौधरीको उपस्थितिमा कृषि कर्जाको वर्तमान अवस्थाबारे सरोकारवालाहरूबीच छलफल

काठमाडौं। कृषि, वन तथा पर्यावरण मन्त्री गीता चौधरीको उपस्थितिमा कृषि कर्जाको वर्तमान अवस्था, सहुलियतपूर्ण कर्जा प्रवाहमा देखापरेका व्यावहारिक समस्या तथा चुनौती र तिनको समाधानका सम्भावित उपायहरूबारे सरोकारवालाहरूबीच समीक्षा बैठक सम्पन्न भएको छ।

बैठकमा मुलुकभर कृषि कर्जाको पहुँच र प्रभावकारिताको विस्तृत समीक्षा गरिनुका साथै सहुलियतपूर्ण कर्जा प्रवाहका क्रममा किसानहरूले व्यहोर्नुपरेका प्रक्रियागत जटिलता तथा वास्तविक लक्षित वर्गसम्म कर्जा पुर्‍याउन देखा परेका बाधा-अड्चनहरूबारे छलफल भएको छ। बैठकमा मन्त्री चौधरीले आगामी दिनमा कृषि कर्जा प्रक्रियालाई थप सरल, सहज र प्रभावकारी बनाई वास्तविक किसानसम्म सहुलियत पुर्‍याउन आवश्यक नीतिगत तथा व्यावहारिक सुधारका कदमहरू अवलम्बन गर्ने प्रतिबद्धता व्यक्त गरेकी छिन्।

उनले वास्तविक किसानहरूलाई सहज रूपमा कर्जाको पहुँच पुर्‍याई कृषि क्षेत्रको व्यवसायीकरण र रूपान्तरण गर्न मन्त्रालय निरन्तर प्रतिबद्ध रहेको बताईन्।