परीक्षा केन्द्रको लापरवाहीप्रति नेविसंघको आपत्ति, राष्ट्रिय परीक्षा बोर्डलाई ध्यानाकर्षण

काठमाडौं। नेपाल विद्यार्थी संघ (नेविसंघ) ले कक्षा १२ को परीक्षाका क्रममा विभिन्न परीक्षा केन्द्रहरूमा देखिएको लापरवाही र अव्यवस्थाप्रति गम्भीर ध्यानाकर्षण गराउँदै राष्ट्रिय परीक्षा बोर्डलाई आज ध्यानाकर्षण पत्र बुझाएको छ।

नेविसंघले चितवनस्थित इन्टरनेशनल कलेज परीक्षा केन्द्रमा नेपाली विषयको परीक्षा निर्धारित समयभन्दा ढिलो सुरु गरिए पनि विद्यार्थीको उत्तरपुस्तिका १७ मिनेट अगावै संकलन गरिएको घटनाप्रति कडा आपत्ति जनाएको छ। संघका अनुसार प्रश्नपत्र छपाइमा ढिलाइ हुँदा परीक्षा बिहान ८:३१ बजे सुरु भएको थियो, तर ११:१३ बजे नै उत्तरपुस्तिका उठाइँदा विद्यार्थीले पूरा समय परीक्षा दिन पाएनन्।

यस्तै समस्या भैरहवा, बालकुमारी कन्या कलेज (काठमाडौं), नुवाकोटलगायत अन्य केन्द्रहरूमा पनि दोहोरिएको नेविसंघले जनाएको छ।

नेविसंघले दोषीमाथि कारबाही, पीडित विद्यार्थीलाई न्याय, परीक्षा व्यवस्थापनमा सुधार तथा प्रभावकारी अनुगमनको माग गरेको छ। विद्यार्थीको भविष्यसँग खेलबाड गर्ने यस्ता गतिविधि स्वीकार्य नहुने भन्दै नेविसंघले समस्या समाधान नभए सशक्त आन्दोलनमा उत्रिने चेतावनी दिएको छ।