४० जनालाई फोटोग्राफी तालिम दिन काठमाडौँ महानगरपालिका र चलचित्र विकास वोर्ड बिच सम्झौता

काठमाडौँ । काठमाडौँ महानगरपालिकाले युवाहरुलाई सिपमूलक र रोजगारमूलक फोटोग्राफी तालिम दिन चलचित्र विकास बोर्डसँग सम्झौता गरेको छ । आज कार्यवाहक प्रमुख सुनिता डंगोलको रोहवरमा प्रमुख प्रशासकीय अधिकृत सरोज गुरागाईँ र वोर्डका अध्यक्ष दिनेशराज दहालका बिच महानगरपालिकाको ‘रोजगारी र आय वृद्धि काठमाडौँको समृद्धि’ गौरव योजना अन्तर्गत सम्झौता पत्रमा हस्ताक्षर गर्नुभएको हो । 

त्यस क्रममा बोल्दै कार्यवाहक प्रमुख डंगोलले, चलचित्र निर्माण गर्न काठमाडौँलाई खुला स्टूडियोको रुपमा विकास गर्न महानगरपालिका र बोर्ड बिच सहकार्य हुन सक्ने बताउनुभयो । ‘चलचित्र र यससँग सम्बन्धित विभिन्न विधाबाट समाज र सामाजिक पक्षलाई जीवन्त बनाउन सकिन्छ । हामी डवली, चोक र ननीहरुमा चलचित्रहरुको प्रदर्शन गर्ने, चलचित्र निर्माणमा निर्माताहरुलाई प्रोत्साहन गर्न अन्तरसंवाद सञ्चालन गर्ने, समुदाय स्तरमा चलचित्र तथा श्रव्यदृश्य उत्पादनको क्षमता विकास तालिम सञ्चालन गर्ने योजनामा छौँ । यस कार्यलाई सहभागितामूलक र दिगो बनाउन हामी क्षेत्रगत विज्ञ र साझेदारसँग सहकार्यका लागि इच्छक छौँ ।’ डंगोलको भनाइ थियो । 

भित्री सहरी क्षेत्रका डवली, चोक र ननीमा कार्यक्रम गरेजस्तै बाहिरी वडाका पार्कहरुमा चलचित्र प्रदर्शनको कार्यक्रम सञ्चालन गरिने योजना रहेको डंगोलको भनाइ छ ।  त्यस क्रममा बोर्डका अध्यक्ष दहालले, चलचित्रमार्फत सहरलाई जीवन्त बनाउने अभियानमा बोर्ड सदैव साथमा रहेको उल्लेख गर्नुभयो । ‘फोटोग्राफीबाट सहकार्य थालेका छौँ । यसलाई बढाएर रचनात्मक उद्योगको विकास र प्रवर्धनमा सहकार्य गर्न हामी तयार छौँ ।’ दहालको भनाइ थियो । 

सम्झौता बमोजिम बोर्डले फोटोग्राफीको कोर्षमा आधारित ४० जनालाई फोटोग्राफी सम्बन्धी तालिम प्रदान गर्नेछ । यसको लागतमा महानगरपालिकाको ८० प्रतिशत र वोर्डको २० प्रतिशत लागत सहभागिता हुनेछ ।