बीवाईडीको याङवाङ यु९ ट्रयाक एडिसनले ४७२.४१ किमी प्रतिघण्टाको स्पिड रेकर्ड कायम

बीवाईडीको प्रिमियम सब-ब्रान्ड याङवाङ ले इलेक्ट्रिक सवारीसाधन (EV) को क्षेत्रमा नयाँ कीर्तिमान कायम गरेको छ। जर्मनीको ATP Automotive Testing Papenburg ट्रयाकमा याङवाङ यु९ ट्रयाक एडिसन सुपरकारले ४७२.४१ किलोमिटर प्रतिघण्टाको उच्चतम गति हासिल गर्दै विश्वकै सबैभन्दा छिटो इलेक्ट्रिक कार बनेको हो।

यो रेकर्ड गत अगस्ट ८ मा व्यावसायिक ड्राइभर मार्क बासेङ को ड्राइभिङमा कायम गरिएको हो। बासेङले यसअघि पनि ग्लोबल ईभी स्पिड रेकर्ड तोडेका थिए। नयाँ प्रविधि र सुधारिएको भर्सनका कारण उनले यसपटक आफ्नै पुरानो रेकर्डलाई तोड्न सफल भएको बताए।

हाल चीनमा बिक्री भइरहेको याङवाङ यु९ को सुधारिएको संस्करण नै यो ट्रयाक एडिसन हो। यसमा यु९ मा प्रयोग भएको E4 प्लेटफर्म र DiSus-X प्राविधिक आर्किटेक्चर प्रयोग गरिएको छ। साथै, यसमा विश्वकै पहिलो १२०० भोल्टको अल्ट्रा–हाई–भोल्टेज भेइकल प्लेटफर्म समावेश छ, जसलाई थर्मल म्यानेजमेन्ट सिस्टम सँग संयोजन गरी चरम अवस्थामा पनि स्थिरता र दक्षता कायम गर्न सकिन्छ।

यस कारमा ३०,००० RPM क्षमताको विशेष मोटर प्रणाली प्रयोग गरिएको छ, जसले प्रत्येक मोटरबाट ५५५ किलोवाट पावर दिन्छ। चारवटै मोटरको संयुक्त उत्पादन ३,००० PS पुग्छ, जसले गाडीको पावर–टु–वेट रेसियो प्रति टन १,२१७ PS पुर्‍याएको छ।

E4 प्लेटफर्मको क्वाड–मोटर टर्क–भेक्टरिङ सिस्टम ले लगातार सडकको स्थिति विश्लेषण गर्छ, जसले ट्र्याक्सन लस वा ह्विल स्लिप हुनबाट बचाउँछ। साथै, DiSus-X Intelligent Body Control System ले कर्नरिङ वा तीव्र एक्सिलरेसनको क्रममा पनि सस्पेन्सनलाई सहज बनाउँदै ड्राइभरलाई बढी कम्फर्ट र विश्वास दिन सहयोग गर्छ।

डिजाइनतर्फ, ट्रयाक एडिसनमा यु९ मा प्रयोग भएको एरोडाइनामिक संरचनालाई अझै सुधार गरिएको छ। यसमा अप्सनल कार्बन-फाइबर फ्रन्ट स्प्लिटर र ट्रयाक केन्द्रित सेमी-स्लिक टायर प्रयोग गरिएको छ, जसले उच्चतम गतिमा पनि स्थिरता कायम राख्छ।

यी सबै प्राविधिक सुधार र इनोभेटिभ डिजाइनका कारण याङवाङ यु९ ट्रयाक एडिसन ले विश्वव्यापी स्तरमा ईभी उद्योगको शीर्ष स्थानमा आफ्नो नाम अंकित गर्न सफल भएको छ।