कवाड व्यवसायीको आक्रोश : ‘बालेनले गुण्डागर्दी गरे’ भन्दै विरोध प्रदर्शन

काठमाडौं । काठमाडौं महानगरपालिका प्रमुख बालेन शाहविरुद्ध कवाड व्यवसायीहरूले मंगलबार सडकमा उत्रिएर प्रदर्शन गरेका छन्।

कवाड व्यवसायी संघर्ष समितिको अगुवाइमा भएको प्रदर्शनमा व्यवसायीहरूले नगर प्रमुखले आफूहरूलाई जबर्जस्ती विस्थापित गर्न खोजेको आरोप लगाएका छन्। समितिका संयोजक राम केवल गुप्ताका अनुसार दुई वर्षदेखि महानगरले कवाड व्यवसायीका घर तथा व्यवसायमा डोजर चलाउँदै आएको र त्यसकै विरोधमा आज आन्दोलन गरिएको हो।

गुप्ताले भने, “हामी निजी जग्गा लिएर, सरकारले दिएको अनुमति अनुसार व्यवसाय गर्दै आएका छौं। मेयरले यो व्यवसाय रहदैन भन्न पाउने अधिकार छैन। समस्या भए वार्तामार्फत समाधान गर्न सकिन्छ।”

उनले महानगरले करिब एक अर्ब रुपैयाँ उठाउने उद्देश्यले गरिबको घर भत्काउन खोजेको आरोपसमेत लगाए। “काठमाडौंबाट कवाड हटाउँदा एक अर्ब रुपैयाँ आम्दानी हुने भएकाले हामीलाई बलपूर्वक हटाउन खोजिएको हो,” उनले भने।