नेप्से ४.८३ अंकले उकालो, तर कारोबार रकममा गिरावट

काठमाडौं । मंगलबार नेप्से परिसूचक ४.८३ अंकले उक्लिँदै २७६६.०९ बिन्दुमा पुगेर बन्द भएको छ। अघिल्लो दिन बजार २१.३० अंकले बढ्दै २७६१.२६ बिन्दुमा बन्द भएको थियो।

यद्यपि परिसूचक उकालो लागे पनि कारोबार रकम भने घटेको छ। सोमबार ५ अर्ब ७५ करोड रुपैयाँ बराबरको १ करोड ८ लाख कित्ता सेयर कारोबार भएको बजारमा मंगलबार जम्मा ९२ लाख ४३ हजार २३२ कित्ता सेयर मात्रै किनबेच भयो। यसदिन ३२२ स्टक समेट्दै कुल कारोबार रकम ४ अर्ब १८ करोड ५३ लाख १५ हजार ७३४ रुपैयाँमा सीमित रह्यो।

उप–सूचकहरूमा पनि सामान्य वृद्धि देखियो। सेन्सेटिभ इन्डेक्स ०.५१ अंक, फ्लोट इन्डेक्स ०.३० अंक र सेन्सेटिभ फ्लोट इन्डेक्स ०.२३ अंकले बढे।

मंगलबारको कारोबारमा विकास हाइड्रोपावर कम्पनीको सेयरमा सकारात्मक सर्किट लाग्यो। कम्पनीको सेयर मूल्य ४२.७० रुपैयाँले उक्लिँदै प्रतिकित्ता ४७०.२० रुपैयाँमा पुगेको छ। त्यसैगरी नेपाल रिपब्लिक मिडियाको मूल्य ४४.२९ रुपैयाँले बढ्दै ५५८.७८ रुपैयाँमा, नारायणी विकास बैंकको ५७.५० रुपैयाँले बढ्दै ८४७.६० रुपैयाँमा र सिवाइसी नेपाल लघुवित्तको ७९.६७ रुपैयाँले बढ्दै १८३७.२३ रुपैयाँमा पुगेको छ।

यद्यपि केही कम्पनीका सेयरमा गिरावट देखियो। कुमारी सबल योजनाको मूल्य ३.६६ प्रतिशत घट्दै ९.२१ रुपैयाँमा झर्‍यो। नाडेप लघुवित्त २.९९ प्रतिशतले घटेर ८१६.११ रुपैयाँमा पुग्यो भने पिपुल्स हाइड्रोपावर कम्पनी २.५९ प्रतिशतले घट्दै ४५०.७० रुपैयाँमा कारोबार भयो।

यसदिन सबैभन्दा धेरै कारोबार हुने कम्पनीहरूमा नेपाल रिइन्स्योरेन्स कम्पनी, हिमालयन रिइन्स्योरेन्स कम्पनी, एनआरएन इन्फ्रास्ट्रक्चर, हिमालयन डिस्टिलरी र बुटवल पावर कम्पनी रहेका छन्।