विश्व फोटोग्राफी दिवसमा अध्यक्ष वन्तको एकल फोटो प्रदर्शनी

काठमाडौं । १८६ औँ विश्व फोटोग्राफी दिवसको अवसरमा राष्ट्रिय फोटोपत्रकार समूह (एनएफपिजे नेपाल) ले एकल फोटो प्रदर्शनी आयोजना गरी दिवस मनाएको छ।

यस वर्ष संस्था अध्यक्ष प्रदीपराज वन्तको Flight and Frame शीर्षकमा काठमाडौंको हनुमानढोका परिसरमा आयोजित प्रदर्शनीमा ६० वटा तस्वीर प्रदर्शित गरिएको थियो। भदौ ३ गते (अगष्ट १९) दिउँसो २ बजेदेखि साँझ ७ बजेसम्म सञ्चालन भएको प्रदर्शनीमा वन्तले पूर्वप्रधानमन्त्री पुष्पकमल दाहाल ‘प्रचण्ड’ को कार्यकालमा अफिसियल फोटोपत्रकार रहँदा हवाइजहाजबाट खिचिएका नेपालका विभिन्न भौगोलिक तथा पर्यटकीय क्षेत्रका तस्बिर समावेश गरेका थिए।

एनएफपिजे नेपालले पहिलोपटक यसरी एकल फोटो प्रदर्शनी आयोजना गरेको हो। संस्थाले आगामी दिनमा अन्य सदस्यहरूको पनि व्यक्तिगत प्रदर्शनी आयोजना गर्दै लैजाने जनाएको छ। वन्त राष्ट्रिय समाचार समिति (रासस) का वरिष्ठ फोटोपत्रकार समेत हुन्।

कार्यक्रमको उद्घाटन संस्थाका पूर्वअध्यक्ष एवं वरिष्ठ फोटोपत्रकार मिनरत्न बज्राचार्य र कविन्द्रमान शाक्यले संयुक्त रूपमा गरेका थिए। प्रदर्शनीमा संस्था सदस्यहरूसँगै पत्रकार, फोटोपत्रकार, फोटोग्राफर, सञ्चारकर्मी तथा फोटोप्रेमीहरूको उल्लेखनीय उपस्थिति थियो।

अध्यक्ष वन्तले प्रदर्शनी सर्वसाधारणलाई लक्षित गरेर हनुमानढोकामा आयोजना गरिएको बताए। कार्यक्रममा स्थानीय बासिन्दा, स्वदेशी तथा विदेशी पर्यटकहरूको पनि सक्रिय सहभागिता रह्यो।

महासचिव घनश्याम श्रेष्ठका अनुसार, यस प्रदर्शनीले विश्व फोटोग्राफी दिवसलाई अझ अर्थपूर्ण बनाउनका साथै फोटो पत्रकारिताको महत्वलाई समाजमा प्रष्ट रूपमा प्रस्तुत गर्ने विश्वास लिइएको छ।